KDI: Vetëvendosje të mos vonojë procesin e formimit të Qeverisë së re
Instituti Demokratik i Kosovës (KDI) ka deklaruar se Kosova tashmë ndodhet në procedura kushtetuese të formimit të një Qeverie të re pas votimit të suksesshëm të mocionit të mosbesimit ndaj Qeverisë së Kosovës më 25 mars.
KDI vlerëson që pas katër letërkëmbimeve në tre javët e fundit në mes të presidentit dhe Lëvizjes Vetëvendosje si subjekt fitues i zgjedhjeve, kjo e fundit pa humbur kohë duhet të ushtrojë të drejtën për të dërguar emrin e mandatarit për formimin e Qeverisë.
“Rrjedhimisht, ne kërkojmë nga Lëvizja Vetëvendosje, që si fituese e zgjedhjeve, të zhvillojë konsulta me subjektet e tjera politike për lidhje të koalicionit të ri dhe të caktojë brenda një afati sa më të shpejtë kohor mandatarin e ri për të formuar Qeverinë”, thuhet në komunikatë.
Sipas KDI-së, nëse LVV nuk ka vullnet politik për ta dërguar emrin e një mandatari për formimin e Qeverisë së re, ajo mund ta ushtrojë të drejtën e refuzimit të mandatit, siç parashihet edhe në aktgjykimin e vitit 2014 të Gjykatës Kushtetuese.
“Megjithëse Kushtetuta jonë nuk e përcakton afatin kohor për propozimin e mandatarit, konsiderojmë se çdo vonesë në shfrytëzimin e kësaj dispozite kushtetuese mund ta shpijë vendin në ngërç institucional dhe kushtetues, si dhe do ta cenojë edhe parimin e stabilitetit institucional të vendit, duke ia pamundësuar Kuvendit ushtrimin e kompetencave të tij në zgjedhjen e Qeverisë”, thuhet në reagim.
Ky institut ka vlerësuar tutje se që stabiliteti institucional është vlerë që duhet të promovohet nga të gjitha subjektet politike në Kosovë, në përputhje edhe me legjitimitetin qytetar.
Presidenti Thaçi fundjavën e kaluar bëri të ditur se gjatë kësaj jave do të ndërmarrë hapat përfundimtarë kushtetues për formimin e Qeverisë së re, me mandat legjitim nga Kuvendi, kjo pasi Lëvizja Vetëvendosje ende nuk i ka dërguar ndonjë emër të mandatarit.
Në anën tjetër, LDK-ja është shprehur e gatshme të formojë një qeveri bashkë me AAK-në, Nismën Socialdemokrate dhe AKR-në.
KALLXO.com ka raportuar për “komoditetin kushtetues” të kryeministrit në detyrë Albin Kurtit për t’ia zvarritur përgjigjen presidentit Hashim Thaçi.
