Kadri Veseli: Kjo Qeveri dhe ky Kryeministër janë rrezik nacional
Kryetari i PDK-së, Kadri Veseli, ka reaguar pas zhvillimeve të mbrëmshme në Kuvendin e Kosovës.
Sipas Veselit seanca e jashtëzakonshme për buxhetin doli se nuk e paska pasur qëllim miratimin e buxhetit por uljen e Albin Kurtit në tryezën e dialogut me Serbinë.
Ai akuzoi pozitën se e përjashtoi me dredhi opozitën nga vendimmarrja rreth ligjit për buxhetin.
“Dhe, pikërisht në kohën e izolimit e sanksioneve të SHBA-së mbi Shtetin e Kosovës, nuk u morën me problemin fundamental para vetes si sfidë – taksën, por menduan vetëm për vetveten, se si të takohen me përfaqësuesit serbë në Dialog, dhe për këtë nxorën Rezolutë pas mesnatës”, ka shkruar Veseli në Facebook.
Ai ka thënë se kjo Qeveri dhe kryeministri Kurti janë rrezik nacional.
Ky është reagimi i plotë i Veselit:
Seanca e jashtëzakonshme për buxhetin, e ftuar nga Kryeministri, doli se nuk paska pasur për qëllim miratimin e buxhetit për kërkesat e qytetarëve, por uljen e Albin Kurtit në tryezën e Dialogut me Serbinë.
Jo negociata?!
Thirrën seancë të jashtëzakonshme për buxhet, duke abuzuar me shqetësimin e emergjencës qytetare për pandeminë e coronavirusit – tashmë të shpërndarë në disa cepa të vendit tonë, edhe për shkak të papërgjegjësisë së kësaj Qeverie në parandalimin e përhapjes së tij.
Përjashtuan me dredhi opozitën nga vendimmarrja e një ligji kaq me rëndësi për qytetarët, si ky për buxhetin.
Tradhtuan qytetarët me premtime, duke mos e përfshirë në buxhet, siç ishte paraparë, rritjen e pagave të sektorit shëndetësor dhe tërë sektorit publik.
Dhe, pikërisht në kohën e izolimit e sanksioneve të SHBA-së mbi Shtetin e Kosovës, nuk u morën me problemin fundamental para vetes si sfidë – taksën, por menduan vetëm për vetveten, se si të takohen me përfaqësuesit serbë në Dialog, dhe për këtë nxorën Rezolutë pas mesnatës.
Kjo flet shumë për rrezikun që i sjell vendit papërgjegjësia dhe arroganca e kësaj Qeverie dhe e këtij Kryeministri, që për asgjë nuk kanë emocion, që askënd nuk e respektojnë dhe asnjë premtim e parim nuk e mbajnë.
Kjo Qeveri dhe ky Kryeministër janë rrezik nacional.
Por, qytetarët gjithsesi do t’u kundërvihen mashtrimeve të tyre.
Kosova, mbi të gjitha, u takon njerëzve të saj që e duan, punojnë për të dhe nuk lejojnë të dëmtohet.
PDK do të jetë aty ku është interesi dhe nevoja e kombit.
