Ish zëvendës ministri i AAK-së Naim Qelaj mbetet kandidati i vetëm për Avokat të Popullit
Naim Qelaj ka mbetur kandidati i vetëm për pozitën e Avokatit të Popullit.
Kjo pasi që Kuvendi i Kosovës në dy raundet e para ka dështuar të votojë Avokatin e Popullit.
Naim Qelaj ndryshe njihet si avokati i cili për vite të tëra e kishte përfaqësuar Shyhrete Berishën nga Suhareka.
Në raundin e parë të votimit nga 96 deputetë që kanë votuar për Avokatin e Popullit, 27 fletë votime kanë qenë të pavlefshme.
Edona Hajrullahu që sipas vlerësimit të Komisionit intervistues ka qenë kandidatja më e poentuar, ka marrë 17 vota, dhe është eliminuar nga gara.
Kurse dy kandidatë që në raundin e parë kanë marrë më së shumti vota Naim Qelaj, 29 vota, dhe Xhavit Shala ka marrë 23 vota, kanë garuar në raundin e dytë të votimit.
Në raundin e dytë të votimeve nga 66 deputetë që kanë votuar, Naim Qelaj ka marrë 32 vota kurse Xhavit Shala 22 vota, ndërsa 12 fletë votime kanë qenë të pavlefshme.
Raundi i tertë i votimi ka dështuar të mbahet në mungesë të kuorumit, ndërsa votimi do të vazhdon ditën e hënë.
Për zgjedhjen e avokatit të popullit votohet lista e ngushtë prej 3 kandidatëve, që Kuvendi ti propozohet nga Komisioni për të Drejtat e Njeriut, pas një konkursi publik.
Nëse në rrethin e parë asnjëri nga kandidatët nuk e fiton shumicën e votave të të gjithë deputetëve të Kuvendit, dy (2) kandidatët që fitojnë më së shumti vota, i nënshtrohen rrethit të dytë të votimit.
Nëse as në rrethin e dytë nuk zgjedhet Avokati i Popullit, kandidati me numrin më të madh të votave nga rrethi i dytë, si kandidat i vetëm i nënshtrohet rrethit të tretë të votimit
Sipas Ligjit për Avokatin e Popullit nëse avokati i Popullit nuk zgjedhet në seancën e parë, atëherë Kuvendi i Kosovës voton për Avokatin e Popullit në seancën plenare të radhës brenda 30 ditëve.
Naim Qelaj me profesion është avokat, dhe për një periudhë të gjatë këtë profesion e ka ushtruar në Prizren, deri në emërimin e tij si zëvendësministër i Drejtësisë.