Ish-prorektori synon postin e rektorit të UP-së
Profesori i Fakultetit të Inixhinerisë Mekanike, Naser Sahiti, po synon postin e rektorit të Universitetit të Prishtinës “Hasan Prishtina”.
“Po synoj postin e rektorit, por ende nuk kam aplikuar. Më ka shtyrë dëshira që të kontribuoj më shumë në Universitetin e Prishtinës, që ta ngjisim edhe më lartë, natyrisht, me e rritë prestigjin e këtij universiteti”, shtoi Sahiti për KALLXO.com.
Sahiti është profesor i rregullt në FIEK dhe ligjëron në Departamentin e Termoenergjetikës dhe Energjisë së Ripërtrishme.
Ai ka qenë prorektor për mësimdhënie dhe çështje të studentëve, por kishte dhënë dorëheqje në vitin 2018, pasi pati mospajtime me rektorin Marjan Dema. Ndërsa nga viti 2013 deri më 2014 ka qenë prorektor për Buxhet dhe Financa në UP si dhe u.d i rektorit të UP-së, pasi kishte dhënë dorëheqje, ish-rektori, Ibrahim Gashi.
Në vitin 2009, Sahiti ka qenë edhe U.D prodekan për çështje mësimore në UP.
Kurse, që nga viti 2015 deri më tani ka qenë anëtar i Bordit të Shkollës Verore të Komunitetit të Energjisë.
Konkursi për rektor
Universiteti i Prishtinës, “Hasan Prishtina” ka hapur konkursin për rektor të këtij Universiteti.
Konkursi është hapur më 10 korrik dhe do të mbyllet më 24 korrik në ora 15:30. Konkurimi për postin e rektorit do të jetë i hapur për kandidatët e brendshëm dhe të jashtëm.
“Kandidatët duhet të kenë përvojë të dëshmuar në mësimdhënie akademike, kërkim shkencor dhe të ketë gradën e profesorit të rregullt, të profesorit të asocuar ose të profesorit asistent, të ketë përvojë të dëshmuar menaxhuese universitare dhe të mos ketë qenë në pozita udhëheqëse në ndonjë parti politike apo në listë zgjedhore të ndonjë partie politike ose koalicioni në nivel qendror dhe lokal në tri (3) vitet e fundit”, thuhet në konkurs.
Rektori zgjedhet nga nga Këshilli Drejtues nga lista e kandidatëve të propozuar nga Komisioni profesional prej pesë anëtareve të cilin komision e formon Senati.
Kandidatët duhet t`i dorëzojn dokumentet e kompletuara në kopje fizike çdo ditë pune prej orës 9.00 – 15.30 në zyrën nr.1 të ndërtesës së Rektoratit të Universitetit të Prishtinës ‘Hasan Prishtina”, Rr. “Xhorxh Bush”, nr.31, 10 000 Prishtinë – Republika e Kosovës dhe duhet t’i adresohen Komisionit Profesional të Senatit të Universiteti të Prishtinës dhe në formë elektronike (të skanuara) në adresën [email protected].
Emërimi i rektorit bëhet nga 1 tetori deri më 30 shtator të vitit 2024.
