Isa Mustafa: Dyshojmë se Haki Rugova u arrestua për nacionalizëm dhe irredentizëm
Kryetari i LDK-së, Isa Mustafa në një përgjigje të shkurtë për KALLXO.com e ka komentuar arrestimin e djeshëm të nënkryetarit të LDK-së, Haki Rugova.
I pari i LDK-së, thotë se dyshojnë që arrestimi i Rugovës është bërë për nacionalizëm dhe irredentizëm.
“Tani për tani dyshojmë se është arrestuar për nacionalizëm dhe irredentizëm!”, tha Mustafa për KALLXO.com.
“Nuk kemi asnjë informatë relevante. Po presim të përfundojë procesi. Por ajo çfarë kanë dhënë deri më tani si arsyetim ngjanë në “nacionalizëm dhe irredentizëm”. Kur të përfundojë procesi dalim me vlerësimet tona”, ka thënë Mustafa për KALLXO.com.
Haki Rugova dhe dy bashkëpunëtor të tij të Komunës së Istogut janë arrestuar mbrëmë nga Policia e Kosovës me urdhër të Prokurorisë.
Rugova dyshohet për konflikt të interesit dhe falsifikim të dokumentit si dhe keqpërdorim të detyrës zyrtare.
“Drejtësia në Kosovë” kishte raportuar për tenderët që kompania familjare e kryetarit Haki Rugova kishte fituar në Komunën e Istogut, e ku sipas deklarimit të pasurisë, përqindje në kompani kishte edhe vet kryetari Haki Rugova.
