IPK kërkon suspendimin e një rreshteri dhe një polici

Inspektorati Policor i Kosovës ka kërkuar suspendimin e një rreshteri dhe një zyrtari tjetër policor.

Këto veprime erdhën në vazhdën e hetimeve të cilat janë duke u kryer nga IPK në lidhje me rastin e keqtrajtimit të një të riu brenda stacionit policor Qendra në Prishtinë.

KALLXO.com mëson se suspendimi i dy zyrtarëve të tjerë policor erdhi pasi që edhe rreshteri edhe polici dyshohen se kishin pasur njohuri në lidhje me rastin e keqtrajtimit të një të riu brenda stacionit policor.

Rreshteri dyshohet se nuk kishte lajmëruar rastin, ani pse ishte në dijeni, ndërsa polici dyshohet se kishte marrë pjesë në keqtrajtim dhe inçizim e një të riu derisa polici H. K., e keqtrajtonte.

KALLXO.com raportoi në lidhje me arrestimin e policit të NJRSH-së, H. K., për të dytën herë brenda 48 orëve. Ai po dyshohet për dy vepra penale keqtrajtim gjatë detyrës zyrtare dhe pengim i të provuarit.