Foto-ilustrim
Inspektori i ATK-së, i arrestuar për ryshfet, nesër del para Gjykatës
Inspektori i Administratës Tatimore të Kosovës, D.F., i cili u arrestua mbrëmë nga Policia në Gjakovë, nesër pritet të dalë para gjykatores për t’u përballur me kërkesën e Prokurorisë për caktimin e masës së sigurisë ndaj tij.
Një gjë të tillë e ka konfirmuar prokurori Ali Uka, ushtrues detyre i kryeprokurorit të Gjakovës.
“Është bërë kërkesa për paraburgim dhe nesër në ora 10:00 do të mbahet seanca paraprake në Gjykatën e Gjakovës”, tha Uka për KALLXO.com.
Inspektori D.F., bashkë me kontabilistin B.H., janë arrestuar nën dyshimin për keqpërdorim të pozitës dhe marrje të ryshfetit.
Sot gjatë ditës, Administrata Tatimore e Kosovës ka suspenduar nga puna inspektorin D.F., në lidhje me dyshimet për korrupsion.
Ai dyshohet se kishte marrë para nga një biznes, me qëllim që të mos e ndëshkonin.
Sipas Policisë, këto para D.F. i kishte marrë përmes një personi të dytë (kontabilistit B.H.), në këmbim të mosshqiptimit të gjobës apo kontrollimit të biznesit të tij.
Në këtë rast, Policia e Kosovës kishte aplikuar masat e fshehta të hetimit, saktësisht “blerje e simuluar”, në të cilin hetim është arrestuar në flagrancë kontabilisti.
Kontabilisti ishte zënë duke pranuar shumën prej 500 eurove, para këto të cilat janë pranuar për inspektorin.
Pas intervistimit të të dyshuarve, Policia ka njoftuar se në konsultim me prokurorin kompetent, me vendim të tij i dyshuari D.F. (inspektor i ATK-së) është ndaluar në mbajtje, ndërsa i dyshuari B.H. (kontabilisti) është liruar në procedurë të rregullt.
