Inspektorati Policor jep detaje për vrasjen në Gjilan, suspendohet polici i dyshuar
Inspektorati Policor i Kosovës (IPK) ka njoftuar se sot në mëngjes ka arrestuar një pjesëtar të Policisë së Kosovës, i dyshuar se është autor i vrasjes që ka ndodhur sot në mëngjes në Gjilan.
Sipas IPK-së, sot rreth orës 05:00 të mëngjesit Policia ka pranuar një informacion së në rrugën “Nato 99”, në Gjilan, ka ndodhur një incident me të shtëna me armë zjarri dhe si pasojë e këtij incidenti një person ka vdekur.
Pasi që dyshimet ishin se në këtë incident i dyshuar ishte një pjesëtar i Policisë së Kosovës, menjëherë përmes “Linjës së kaltër” janë njoftuar hetuesit e IPK-së të cilët kanë dalë në vendin e ngjarjes.
“Bazuar në hetimet preliminare dyshohet se personi i dyshuar V.H. pjesëtar i Policisë së Kosovës, jashtë detyrës zyrtare, ka shtënë me armë zjarri në drejtim të viktimës L.S.”, njofton IPK.
Hetuesit e Inspektoratit Policor së bashku me njësitin e forenzikës dhe njësinë rajonale të hetimeve janë akoma duke bërë këqyrjen e vendit të ngjarjes në vendin ku ka ndodhur incidenti në konsultim edhe me prokurorin kujdestar që është prezent aty.
Trupi i pajetë i viktimës është dërguar në Institutin e Mjekësisë Ligjore në Prishtinë.
Personi i dyshuar në këtë rast – zyrtari policor, është arrestuar nga Inspektorati Policor kurse me vendim të prokurorit të njëjtit i është caktuar masa e ndalimit për 48 orë dhe është suspenduar nga detyra.
Veprimet e mëtutjeshme hetimore lidhur me këtë incident do të vazhdojnë nga hetuesit e IPK-së në konsultim të vazhdueshëm me prokurorin përgjegjës.