Fisnik Millaku dhe Drita Millaku
Iniciohet procedurë disiplinore për bashkëshortin e deputetes së LVV-së pas raportimit të KALLXO.com
Policia e Kosovës ka iniciuar procedurë disiplinore ndaj Fisnik Millakut, pas raportimit të KALLXO.com se i njëjti është gjobitur pas organizimit të ahengut për djalin e tij në kohë pandemie.
Millaku është zyrtar policor në Policinë e Kosovës, më saktësisht staf civil në Drejtorinë Rajonale të Policisë në Prizren.
I njëjti është bashkëshort i deputetes së Lëvizjes Vetëvendosje, Drita Millakut.
Policia e Kosovës në disa përgjigje për KALLXO.com ka treguar në detaje veprimet që janë ndërmarrë ndaj Fisnik Millakut.
“Në lidhje me trajtimin e informatës nga aspekti i shkeljes së vendimit të Qeverisë së Kosovës në fuqi dhe e Ligjit 07/L-006 për masat ligjore anti Covid19, nga i potencuari nga ana juaj, rasti është trajtuar nga DRP Pejë/ SP Klinë, dhe të njëjtit i është shqiptuar tiketa me nr. (…), për organizim të ahengut në fshatin Ujmir KK Klinë, për çka ekziston edhe kopja e tiketës së shqiptuar nga SP Klinë”, thuhet në përgjigjen e policisë.
Tutje të njëjtit kanë treguar për KALLXO.com se Millaku ka kryer shkelje të rëndë disiplinore.
“Sa i përket aspektit të shkeljes disiplinore, komfor Ligjit për Zyrtarët Publik nr.06/L-114, neni 46 paragrafi 3 ,,Shkeljet e rënda’’ , ndaj të apostrofuarit nga ana juaj, dje datë 14.09.2021 është iniciuar procedura disiplinore, e cila i është adresuar Sekretarisë së Komisioneve Disiplinore për Shërbyes Civil , komform ligjit e rregullores për Zyrtarët Publik, dhe është në proces të kompletimit/dorëzimit fizikisht përmes zinxhirit komandues në këtë Komision”, ka thënë tutje policia.
KALLXO.com gjatë ditës së djeshme njoftoi për gjobitjen e Millakut për shkak të organizimit të ahengut për fejesën e djalit të tij në një shtëpi të përbashkët familjare në fshatin Ujmir të Komunës së Klinës.
Qeveria e Kosovës dhe Ministrisë së Shëndetësisë, e cila udhëhiqet nga LVV, subjekt të cilit i takon edhe Drita Millaku, kanë marr vendime që për shkak të situatës me pandeminë COVID-19 të ndalohen të gjitha ahengjet, dasmat e organizimet tjera që mund të jenë më masive.
Burri i deputetes së LVV-së, zyrtar i Policisë së Kosovës, gjobitet për ahengun familjar