IKSHPK apelon qytetarët të respektojnë rekomandimet, bartja e maskave obligim

Instituti Kombëtar i Shëndetit Publik në Kosovë, me anë të një njoftimi ka bërë apel për qytetarët e Kosovës që të respektojnë rekomandimet e dhëna për të mos përhapur pandeminë COVID-19.

Madje IKSHPK ka thënë se mbetet obligim bartja e maskës nga ana e qytetarëve.

Virusi është kudo! Ju lutemi pëmbajuni rekomandimeve!

“Zbatimi i rekomandimeve të Institutit Kombëtar dhe Ministrisë së Shëndetësisë shpëton jetë! Këtë duhet ta bëjë çdo qytetar i Republikës së Kosovës, që të ruajë veten, të afërmit dhe të tjerët. Bartja e maskave mbetet obligim”, thuhet në njoftimin e IKSHPK-së.

IKSHPK ka apeluar te qytetarët, bizneset, gastronomia, që në mënyrë strikte të respektojnë distancën fizike, përdorimin e maskave, dezinfektimin dhe ajrosjen e lokaleve, duke pamundësuar përhapjen eventuale të infeksionit dhe shmangien e përhapjes në hapësirat e mbyllura.

“Ne po shkojmë drejt një normaliteti të ri. Ky normalitet i ri paraqet ndërrimin e sjelljeve tona për të mirë, për të mbajtur higjienën, për të mbajtur distancën, për të mbajtur maskën, për të mos përhapur piklat tona të cilat i qesim nga goja çdo ditë, dikush më shumë e dikush më pak, e që rrezikojnë shëndetin e të tjerëve, por në radhë të parë shëndetin e të afërmve, të familjes, të fëmijëve, të farefisit, të komunitetit, dhe pastaj të gjithë qytetarëve”, thuhet në njoftim.

Tutje IKSHPK thotë se Inspektoratet sanitare të AUV dhe Inspektoratet komunale bashkë me shtabet komunale duhet patjetër të zbatojnë Ligjin për Inspektoratin dhe Ligjin për parandalimin e sëmundjeve ngjitëse duke u mbështetur në Manualin për luftimin e COVID-19 dhe të merren masa përgjegjësie në çdo rast të mos zbatimit eventual të rekomandimeve të Institutit Kombëtar.

“Çdo shkelje e rregullave nga kushdo do të konsiderohet rrezikim i shëndetit dhe jetës së të tjerëve. Nuk ka të drejtë askush të rrezikojë jetën e të afërmve të tyre, të moshuarve dhe personave me sëmundje kronike për shkak të pakujdesit dhe mos zbatimit të rekomandimeve. Vazhdoni të mbani distancën fizike dhe maskat! Lani duart me kujdes disa herë në ditë nga 20-30 sekonda! Lehtësimi i masave është bërë për të na bërë më të përgjegjshëm! Ju lutem të keni kujdes, sepse akoma ekziston rrezik i përhapjes në vendet ku ka grumbullim të madh të njerëzve!”, thuhet në njoftim të IKSHPK-së.

Mbrëmë pak para mesnatës Instituti Kombëtar i Shëndetit Publik njoftoi për një rekord rastesh të vdekjeve dhe rasteve pozitive me coronavirus.

Vetëm gjatë ditës së djeshme janë shënuar 8 viktima dhe 178 raste të reja me COVID-19.