Hoxhaj e fton Kurtin sërish në debat: "Qe 7-8 javë po të them hajde matemi"
Kandidati për kryeministër nga PDK, Enver Hoxhaj, gjatë një takimi me fermerët e komunës së Rahovecit e ka ftuar edhe një herë kryetarin e Lëvizjes Vetëvendosje, Albin Kurtin, që të përballet në debat me të.
“Meqë Albini po i ikë debatit, nuk po guxon me dalë në debat, a nja 4, 5 vite thoshte në Kuvend të Kosovës dilni matnu, edhe unë po i them që 7, 8 javë dil matu se ai nuk ka program, nuk dëshiron me pas program, nuk i interesojnë interesat e qytetarëve të Rahovecit, nuk i intereson bujqësia. Ai mendon që rrushi piqet vetëm duke e pa, jo punën që e bëni ju. I vetmi subjekt politik serioz në këto zgjedhje për ta udhëhequr vendin është Partia Demokratike e Kosovës dhe jam unë”, ka thënë ai.
Hoxhaj tutje ka thënë se qeveria e udhëhequr nga ai do të krijojë lehtësira për fermerët, duke përmendur se rrushin të cilin nuk mund ta shesin do ta blejë qeveria e vendit.
Ai ka premtuar edhe rritje 100 % të subvencioneve në pemëtari.
“Ne do ta mbështesim, do ta subvencionojmë çdo litër vere. Mbështetja do të jetë financiare e madhe dhe e mirëfilltë. Së dyti, do t’iu ofrojmë qasje në kredi dhe do t’i mbulojmë kreditë nëse kanë më pas nevojë bujqit e Rahovecit. Ne garantojmë çmimin e rrushit dhe ne garantojmë që nëse ju rrushin nuk mund ta dorëzoni në një bodrum dhe ta shisni këtë rrush, do ta blejë qeveria e ardhshme e Kosovës”, ka thënë ai.
Nga Rahoveci, Hoxhaj ka thënë se nga 15 shkurti PDK-ja do të udhëheqë me vendin, pas dy qeverive të cilat sollën vetëm krizë.
“Zgjedhjet të cilat po mbahen janë një lajm i mirë për vendin, se dy qeveritë të cilat ishin në pushtet gjatë vitit 2020 ishin qeveri të shkurta dhe prandaj kjo qeveria Kurti e ka pasur më vend emrin e saktë Qeveria Shkurti. Kjo Kurti ke e shkurt, 50 ditë. Kjo Hoti ke 150 ditë. Kjo qeveria e dytë Hoti ke përnjëmend qeveri koti. Është lajm i mirë që të dy qeveritë nuk do të jenë më në pushtet dhe që pushteti do t’i takojë PDK-së dhe PDK e unë si kryeministër i ardhshëm prej 15 shkurtit do ta udhëheq vendin me votën tuaj në Rahovec”, ka thënë ai.
Më 13 janar, kandidati i Partisë Demokratike të Kosovës për kryeministër, Enver Hoxhaj, ka ftuar kreun e Lëvizjes Vetëvendosjes, Albin Kurtin, në pesë debate publike.
Por, Kurti e kishte refuzuar atë duke thënë se “nuk kam çka lypi, ata po bëjnë garë për të dytin”.
Pas kësaj, Hoxhaj i kishte bërë përsëri thirrje Kurtit për debat më 17 janar.
Gjatë prezantimit të programit qeverisës të PDK-së, Hoxhaj i ka bërë thirrje Kurtit ta rishikojë qasjen, sipas tij, pa respekt ndaj proceseve demokratike.
“I bëj thirrje Albin Kurtit që të rishikoj qasjen pa respekt ndaj proceseve demokratike. I bëj thirrje Albin Kurtit të largojë retorikën e tij populliste. Mjaft me popullizëm të papërgjegjshëm.Mjaft më me premtime të zbrazëta”, kishte thënë Hoxhaj.
Zgjedhjet nacionale do të mbahen të dielën e 14 shkurtit.