Hoti paralajmëron vit të vështirë për bujqit: Qeveria urgjentisht të rrisë subvencionet

Ish-kryeministri i Kosovës, Avdullah Hoti ka paralajmëruar një vit të vështirë për bujqit. Sipas tij, ky vit do të jetë i tillë, nëse Qeveria nuk i rrit subvencionet për së paku 25%.

“Sipas Agjencisë së Statistikave, çmimet e inputeve bujqësore, ku hyjnë farërat, plehrat, pesticidet, ushqimi i kafshëve dhe të ngjashme, në tremujorin e fundit të vitit 2021 janë rritur me 25.3% krahasuar me një vit më parë. Për plehrat dhe ushqimin e kafshëve në veçanti, rritja e çmimeve ka qenë shumë më e lartë”, ka shkruar Hoti në Facebook.

Sipas tij, me rritje të çmimit të inputeve bujqësore, bujqit do ta kenë të vështirë të mbajnë nivelin e prodhimit si në vitin paraprak.

“Kjo do të ndikojë në rënien e të ardhurave të mijëra familjeve që aktivitet kryesor e kanë bujqësinë. Efekti negativ do të jetë zinxhiror, pasi do të rritet importi i produkteve bujqësore dhe do të përkeqësohet aftësia konkurruese e prodhuesve kosovarë në tregun e brendshëm dhe të jashtëm”, tha Hoti.

Hoti kërkoi nga Qeveria që urgjentisht të rrisë subvencionet për bujqësi së paku për 25% për të ruajtur nivelin ekzistues të aktivitetit bujqësor në vend.

“Po aq e rëndësishme për bujqit është që subvencionet të paguhen në kohën kur bujqit duhet të blejnë inputet bujqësore.  Nëse subvencionet nuk rriten, atëherë sivjet mund të shohim më shumë tokë djerrë dhe ferma të kafshëve që mbyllen”, tha ish-kryeministri.

“Në kontekst të rritjes së pasigurisë në tregjet globale, është e rëndësisë strategjike sigurimi i një niveli minimal të prodhimit bujqësorë, krahas qëndrueshmërisë së furnizimit me energji që duhet të sigurojë Kosova në afat të gjatë.  Këto të dhëna të Agjencisë së Statistikave janë mbledhur sipas metodologjisë së Eurostatit, ku janë përfshirë 77 inpute bujqësore, duke evidentuar çmimet në barnatore bujqësore, farmaci veterinare, biznese dhe tregje të ndryshme ku tregtohen inputet bujqësore”, tha ai më tej.

Ministri i Bujqësisë Faton Peci, vitin e kaluar kishte bërë Shpalljen e Programit të Pagesave Direkte për fermerët, në vlerë prej 50 milionë euro.

50 milionë euro vlera e mbështetjes direkte për bujqësinë më 2021

.