Historia e lypësit që po gjobitet me nga 500 euro në Ferizaj

Tash e katër muaj 69-vjeçari nga Korça është duke jetuar në Ferizaj. Duke lypur ai po përpiqet të sigurojë para që të blejë ilaçet për sëmundjen e zemrës.

I moshuari nga Shqipëria është dënuar tre herë nga Policia e Kosovës për shkak se ka kërkuar lëmoshë në rrugë.

Duke mbajtur lotët 69-vjeçari rrëfen se Policia e dënoi tre herë me nga 500 euro për të cilat është detyruar të marrë borxh nga miqtë e tij në Shqipëri.

Përderisa me njërën dorë mbahej në bastun, me dorën tjetër shpaloste dokumentet e mjekut.

“Sot jam gjallë, nesër nuk jam. Të gjitha këto janë dokumentet e spitalit, të cilat nuk i kanë marrë parasysh fare. Ju thash unë që për ilaç po i kërkoj, më thanë është e ndaluar”, tregon ai për KALLXO.com.

Nga fillimi i vitit 2021 deri më tani në rajonin e Ferizajt janë shqiptuar 36 fletëparaqitje ndaj personave që janë hasur duke kërkuar lëmoshë.

“Personi H.Sh. i moshës 69-vjeçar, shtetas i Shqipërisë, është ndaluar nga policia, ngaqë ka vepruar në kundërshtim me Ligjin për kundërvajtje dhe ndaj tij është  shqiptuar një fletëparaqitje prej 500 eurove. Ndërkaq ky person është recidivist”, thuhet në përgjigjen e Policisë.

Tutje, 69-vjeçari është shprehur se “Gjysma e Shqipërisë  është këtu (në Kosovë), nëse nuk jeni ju ne do të vdesim në Shqipëri”.

“Unë as nuk kam vjedhur, as nuk kam vrarë, as nuk kam therur, as nuk kam hapur dyqanet që të marr gjëra, por kërkoj para që të blejë ilaçe”, ka thënë plaku.

Ferizaj, Policia gjobit lypësin me 500 euro

www.kallxo.com