Hetuesia ka në dorë pamje të vrasjes që ndodhi në Pejë

Që nga mbrëmja e kaluar ende nuk ka një version zyrtar se kush e nisi incidentin me armë mbrëmë në Pejë ku mbetën të vrarë dy persona.

Hetuesia tashmë ka në dorë edhe disa pamje të cilat mund të zbardhin në tërësi ngjarjen e rëndë në të cilën mbetën të vdekur Astrit Ademaj dhe Blerand Kadrijaj.

Kështu ka thënë avokati Gëzim Kollçaku, i cili po mbron të mbijetuarin e këtij rasti Avni Ademaj, i cili nga të shtënat me armë kishte marrë plagë në krah.

“Janë disa pamje të kamerave, janë siguruar edhe ato nga policia. Hala nuk i kam pa kamerat por ka pamje. Unë ende nuk kam arritur t’i shoh sepse sot kemi qenë në vendin e ngjarjes për nja 2-3 orë pastaj kemi qenë në intervistë në Prishtinë sepse e kanë marrë rastin Krimet e Rënda dhe nuk kam mbërri me i pa kamerat”, tha avokati Kollçaku.

Disa orë pas ngjarjes, Avni Ademaj, i plagosuri në ngjarjen e mbrëmshme në Pejë, është rrëfyer para hetuesve të Policisë së Kosovës për rrethanat se si ai e kishte parë ngjarjen.

Ademaj për momentin është person i dyshuar në ngjarjen ku mbeti i vrarë vëllai i tij, Astrit Ademaj, dhe Blerand Kadrijaj.

KALLXO.com ka arritur të sigurojë të dhëna të cilat zbardhin rrëfimin që Avni Ademaj u ka dhënë hetuesve.

Edhe pse dëshmia e tij është dhënë në cilësinë e personit të dyshimtë ajo ofron njërin nga versionet e para të kësaj ngjarjeje.

Sipas avokatit Gëzim Kollçaku, Avni Ademaj nuk ka qenë prezent në kohën kur ka nisur konflikti.

“Ai po thotë se ka dëgju zhurmë, kur ka mbërri aty ka pa breshëri armësh mes dy personave, dy revole janë gjetur në vendin e ngjarjes, Klienti ka thënë që ka ndërhy edhe është qëllu edhe ky”, tha avokati Kollçaku deri sa shton se kanë filluar hetimet dhe është bërë edhe propozimi për caktim të paraburgimit nga ana e Prokurorisë së Pejës.

Tutje avokati Kollçaku shton edhe se klienti i tij në intervistë ka thënë se nuk ka gjuajtur me armë dhe se i përfshirë në rast ka qenë vetëm vëllai i tij.

“Ka thënë në intervistë se nuk ka shansa ai me qenë i përfshirë apo me gjujtë. S’ka qenë i përfshirë. Ai ka deklaru për vëllanë e tij edhe ai tjetri. Të shohim nesër se në çka po bazohet prokurorja sepse nuk është marrë në pyetje asnjë dëshmitar as nuk ka pasur dëshmitar okular që me thanë po i kam parë”, tha në fund avokati.

Kollçaku ka përshkruar edhe momentin kur sipas tij është plagosur klienti i tij.

“Klienti im mbahet për momentin në spital pasi është i plagosur në dorë. Ai u ka thënë hetuesve se kur është futur në lokal personi tjetër nga pozicioni ku ka qenë i shtrirë ka qëlluar edhe dy plumba njëri prej të cilëve e ka goditur në krah”, ka thënë Kollçaku.

KALLXO.com raportoi në lidhje me rastin që ndodhi mbrëmë në Pejë.

Astrit Ademaj kandidat i PDK-së për Pejë dhe Blerand Kadrijaj is- kandidat i PDK-së për Decan në zgjedhjet e 2017 mbetën të vrarë nga të shtënat me dy pistoleta.

Ngjarja ende vazhdon të mbetet mister pasi prokuroria nuk ka dalë ende me një version zyrtarë për motivet e kësaj ngjarje ndërsa personi i vetëm i paraburgosur deri më tani është personi i plagosur.

Viktimat sipas konfirmimit të Spitalit Rajonal të Pejës ishin pranuar pa shenja jete ndërsa i plagosuri është trajtuar më pas është intervistuar në lidhje me ngjarjen.

Për incidentin me armë në Pejë kanë reaguar edhe Partia Demokratike e Kosovës ndërsa gjatë ditës së sotme të njëjtit kanë anuluar të gjitha planifikimet në shenjë nderimi për Ademajn dhe Kadrijajn.