Ilustrim
Hashim Thaçi “vajton" bujqit pas dëmeve të pësuara nga reshjet e fundit
Presidenti Hashim Thaçi, përmes një postimi në Facebook ka folur për dëmet që iu shkaktuan bujqve të Kosovës nga të reshurave e sotme të shiut e breshrit.
Thaçi ka shkruar se është e dhimbshme të shohësh se si është dëmtuar puna e bujqve dhe se Kosova duhet të bëjë më shumë për ata dhe bujqësinë.
“Shumë e dhimbshme të shohësh sa është dëmtuar puna e bujqve tanë, djersa dhe mundi i tyre, dje dhe sot, pas breshrit dhe rrebesheve të shiut në vendin tone” ka shkruar Thaçi.
Ai ka thënë se nuk është aspak e lehtë të merresh me bujqësi, veçanërisht pasi rreziku nga fatkeqësitë natyrore i kanoset gjithnjë sektorit.
Sipas tij, një dëm sezonal, bujqve shpeshherë ua bënë të pamundur mbijetesën biznesore apo edhe punimin e tokës së tyre në sezonin e ardhshëm.
“Prandaj, Kosova duhet të bëjë më shumë për bujqit dhe bujqësinë. Duhet të bëjë më shumë për njerëzit tanë të vyeshëm dhe për këtë sektor jetik për ekonominë tonë”, tha Thaçi.