Hashim Thaçi: Nuk jam intervistuar nga Gjykata Speciale
Presidenti i Kosovës, Hashim Thaçi, ka mohuar të jetë intervistuar nga Gjykata Speciale.
I pyetur nga gazetarja Jeta Xharra nëse është intervistuar nga kjo Gjykatë, presidenti Thaçi ka qenë i shkurtër në përgjigjen e tij.
“Nuk jam intervistuar as në Prishtinë as në Vjenë”, ka thënë shkurt presidenti.
Deri më tani nga Gjykata Speciale janë intervistuar, ish-kryeparlamentari Kadri Veseli si dhe ish-kryeministri Ramush Haradinaj, i cili pikërisht për shkak të ftesës nga Specialja ka dhënë dorëheqje nga posti i tij.
Historiku i Gjykatës Speciale
Gjykata Speciale ishte miratuar më 3 gusht të vitit 2015 në Kuvendin e Kosovës, pas kërkesave të shumta nga ndërkombëtarët.
Me 82 vota për, 5 kundër dhe 1 abstenim, deputetët e asaj legjislature i kishin votuar ndryshimet e nevojshme kushtetuese të cilat i kishin hapur rrugë themelimit të kësaj gjykate të kërkuar nga bashkësia ndërkombëtare.
Në atë kohë, kryeministër kishte qenë Isa Mustafa, ndërsa zëvendëskryeministër Hashim Thaçi. Ky i fundit kishte qenë shumë i zëshëm në mbështetjen e krijimit të kësaj Gjykate.
Gjykata Speciale për Kosovën në përbërjen e saj do të ketë vetëm prokurorë e gjykatës ndërkombëtarë.
Ajo ka filluar punën muajve të fundit, kur ka ftuar disa ish figura të larta të Ushtrisë Çlirimtare të Kosovës.
Lëvizja Vetëvendosje kishte qenë partia e vetme e cila unanimisht kishte votuar kundër krijimit të kësaj Gjykate, ndërsa nga partitë e tjera ka pasur disa figura të pakta që kanë votuar kundër.