Haradinaj mirëpret marrëveshjen për targa, kërkon përmbyllje të procesit me njohje
Lideri i Aleancës për Ardhmërinë e Kosovës, Ramush Haradinaj, ka mirëpritur arritjen e marrëveshjes për tabela të makinave.
Haradinaj ka kërkuar që tani të përmbyllet marrëveshja për njohje me lidership amerikan.
“Mirëpres arritjen e marrëveshjes për targa. Tani të përmbyllet marrëveshja për njohje, me lidership Amerikan”- ka shkruar Haradinaj.
I pari i AAK-së ka qenë kritik ndaj kryeministrit Albin Kurti për mosrespektim të kërkesës amerikane që të shtyhej afati për tabela për 10 muaj.
Kosova dhe Serbia kanë arritur sonte marrëveshje lidhur me çështjen e targave.
Lajmin e ka bërë të ditur Përfaqësuesi i Lartë i BE-së për Politikë të Jashtme, Josep Borrell.
Sipas tij, Serbia do ndalojë lëshimin e targave për qytetet e Kosovës, derisa Kosova do ndërpresë veprimet në lidhje me riregjistrim të automjeteve.