Hapja e arkivave, Bislimi sqaron deklaratat

Zëvendëskryeministri i parë i Kosovës, Besnik Bislimi, ka thënë se qasja në arkivat shtetërore të Kosovës dhe Serbisë do të krijonte mundësi të reja për të zbuluar detaje mbi personat e zhdukur.

Në fillim të muajit shtator, Bislimi deklaroi se janë pajtuar me Serbinë që të hapen arkivat.

Por, hapjen e arkivave shtetërore e kundërshtoi fort opozita kosovare.

Kundërshtitë, zëvendëskryeministri për dialog, Besnik Bislimi, i ka quajtur të koordinuara dhe sulme.

“Te hapja e arkivave ka ndodhur një keqinformim i qëllimshëm i opinionit”, tha Bislimi në emisionin “Kallxo Përnime”.

Ai tha se në të kaluarën në Bruksel pala serbe është munduar t’i fshehë krimet e saj duke u thirrur në informacione të klasifikuara.

“Ata kanë rezistuar në hapjen e arkivave dhe informacioneve të klasifikuara të forcave ushtarake, policore dhe paramilitare dhe të shërbimit sekret, me argumentin se informatat e tilla, inkriminuese, ka edhe pala kosovare dhe në njëfarë mënyre, të dy palët jemi fajtorë dhe nuk drejtojmë gishtin te njëri- tjetri”, deklaroi Bislimi.

Tutje, numri dy i Qeverisë tha se në arkivat e Kosovës nuk ka fare informacione të klasifikuara.

“Në Kosovë, që nga viti 2000 të gjitha arkivat shtetërore janë menaxhuar nga UNMIK-u, më vonë nga EULEX-i dhe ka informata se në një moment të caktuar për ditë të tëra aty kanë qëndruar përfaqësuesit e Prokurorisë Speciale. Do të thotë, në arkivat shtetërore të Kosovës, ka zero informata të klasifikuara dhe zero informata inkriminuese”, deklaroi ai.

Sipas tij, hapja e arkivave është e rëndësishme për gjetjen e personave të zhdukur.

“Ne kemi thënë që informatat e klasifikuara në Serbi, tek arkivat ushtarake, policore dhe të shërbimit sekret, janë shumë të vlefshme për të zgjidhur problemin, komponentën e parë për personat e pagjetur”, tha ai.