Haki Abazi: Ka munguar vullneti politik që mjedisi të jetë qendër e zhvillimit ekonomik të qëndrueshëm
Haki Abazi, deputet i Kuvendit të Kosovës dhe anëtar i “Grupit të Gjelbër” në kuadër të Kuvendit të Kosovës, i ftuar në konferencën “Marrëveshja e Gjelbër Evropiane: Synimet që duhet të përmbushë Kosova drejt efikasitetit të energjisë dhe mjedisit më të shëndetshëm”, tha se duhen kthime radikale për të vënë në qendër energjinë e gjelbër e resurset natyrore.
“Përkushtimi dhe zotimi i parlamentit të tanishëm është që të jetë krejt ndryshe planifikimi për zhvillim të qëndrueshëm. Do të vazhdojmë aty ku e kemi lënë në 2010 në diversifikim të plotë të resurseve energjetike. Kosova fatkeqësisht ka 98% derivate fosile, kryesisht linjit. Në mungesë të programit për efiçiencë vazhdon të djegë qymyr për ngrohje gjatë dimrit. Kosova vazhdon me qenë shteti më joefikas në shfrytëzimin e energjisë në Evropë. Deri më sot ka munguar vullneti politik që mjedisin me e bo qendër të zhvillimit ekonomik të qëndrueshëm. Duhet një kthim komplet radikal ku e gjelbra, mjedisi, uji, ajri bëhen pjesa qendrore e zhvillimit ekonomik”, ka thënë Abazi.
Abazi ka shtuar se Kosova deri më tash nuk ka pasur agjendë të caktuar se si të sigurojë energjinë.
Sipas tij, disa kanë sjellë koncepte gjermane, amerikane e turke e që s’kanë qenë në harmoni me mjedisin dhe njerëzit në Kosovë e as me vizionin evropian të reduktimit të emitimeve.
Në konferencën e moderuar nga Jeta Xharra morën pjesë Viola Von Cramon – Taubadel, deputete e Parlamentit Evropian dhe anëtare e Grupit të të Gjelbërve në kuadër të Parlamentit Evropian, Haki Abazi, deputet i Kuvendit të Kosovës dhe anëtar i “Grupit të Gjelbër” në kuadër të Kuvendit të Kosovës, Flutra Zymi, aktiviste e shoqërisë civile (çështjet mjedisore), Linda Çavdarbasha, zëvëndëministre e Ministrisë së Mjedisit dhe Visar Kelmendi, drejtor ekzekutiv i Green Energy Technologies.
Në këtë konferencë u shpalosën caqet e “European Green Deal” të cilat Kosova duhet t’i ndjekë drejtë efiçiencës së energjisë në Kosovë, ndikimin në ekonominë e Kosovës si dhe mirëqenies sociale të njerëzve. Në konferencë u fol edhe për energjinë e ripërtërishme në Kosovë, politikat ekzistuese dhe shembujt e suksesshëm që Kosova duhet t’i aplikojë drejt përputhjes me “European Green Deal” dhe integrimit evropian.
Kjo konferencë u organizua si pjesë e aktivitetit “Ditët e Energjisë së Gjelbër 2021”, aktivitet brenda projektit të financuar nga Zyra e Bashkimit Evropian në Kosovë, “Evropianizimi i Agjendës Mjedisore të Kosovës” – “Ditët e Energjisë së Gjelbër”.
Ky botim është prodhuar me përkrahjen e Bashkimit Evropian. Përmbajtja e këtij botimi është përgjegjësi e BIRN-it dhe në asnjë mënyrë nuk mund të konsiderohet si qëndrim i Bashkimit Evropian. Ky botim është pjesë e aktivitetit “Ditët e Energjisë së Gjelbër 2021” që mbahet nga 28 qershori deri më 7 korrik 2021, brenda projektit të financuar nga Bashkimi Evropian, “Evropianizimi i Agjendës Mjedisore të Kosovës”.