Google Maps prezanton tjera risi, një ndër to do ta bëjë udhëtimin tonë më të lehtë

Përveç kërkimit më të lehtë të zonave të pyllëzuara, azhurnimi i fundit jep shumë më tepër liri kur kërkoni për vende që, ndër të tjera, nuk kanë as adresë

Google i ka bërë publike edhe zyrtarisht disa veçori të reja për aplikacionin Maps që synojnë ‘bashkësitë më të sigurta, më të qëndrueshme dhe të njohura globale’.

Bazuar në hartat e zjarrit të Google që dolën vitin e kaluar për të ndihmuar në gjurmimin e fatkeqësisë në Kaliforni, shënjuesi i zjarrit Google tani është në dispozicion për të gjithë. E tëra që përdoruesi duhet të bëjë është të shtypë gishtin mbi zjarrin virtual, domethënë ikonën e flakës kuq e bardhë, për të parë kontaktet e nevojshme si numrat e urgjencës, detajet e evakuimit etj. Vetë hartat, pasi të aktivizohet kjo veçori, do t’i japin përdoruesit një pasqyrë në përhapjen dhe gjendjen e zjarrit, shkruan PC Mag.

Kjo veçori e re do të vijë në Android këtë javë, ndërsa iOS dhe desktopët do ta marrin atë gjatë muajit të ardhshëm.

Google gjithashtu do të prezantojë një mjet për gjurmimin e pyjeve në vitin 2022 duke përdorur mjetin falas Environmental Insights Explorer (EIE). Sistemi do të mbulojë mbi 100 vende në të gjithë botën, përfshirë Guadalajaran, Sidnein dhe Toronton.

“Qytetet në të gjithë botën i kanë thënë Google se është e vështirë të vendosësh synime klimatike kur nuk ke qasje në informacione të besueshme dhe autentike”, tha Rebecca Moore, drejtuese e Google Earth dhe Earth Engine.

Me ndihmën e imazheve ajrore dhe inteligjencës artificiale, Tree Canopy identifikon zonat e kërcënuara nga një rritje e papritur e temperaturës. Këto të ashtuquajtura ‘ishuj të nxehtësisë’, sipas Google, ndikojnë në mënyrë disproporcionale në zonat me të ardhura të ulëta dhe kërcënojnë cilësinë e ajrit atje.

Tree Canopy, e projektuar në Los Anxhelos, siguron njohuri për vendet ku tendat ofrojnë hije të shtuar dhe temperaturë të reduktuar.

Google gjithashtu ndihmon qeveritë dhe OJQ -të të lundrojnë në vende që nuk kanë adresë. “U deshën disa vjet për të krijuar një adresë për një qytet ose fshat të tërë”, shkroi Moore në blogun e saj zyrtar dhe vazhdoi duke thënë se “Krijuesi i adresave e shkurton këtë procedurë në disa javë – duke ndihmuar zonat pa adresa të shfaqen në harta sa më shpejt të jetë e mundur me një kosto shumë më të ulët”.

Përgatiti: Nuhi Shala