Lulzim Zeneli Foto: Facebook
Gjykata i Vendos Masë të Përkohshme Konkursit për Profesor – Asistent
Gjykata Themelore në Prishtinë i ka vendosur masë të përkohshme konkursit të Universitetit të Prishtinës për angazhimin e një profesor-asistenti në Fakultetin e Shkencave Matematikore-Natyrore. Kjo masë e përkohshme është vendosur pas padisë së bërë nga Lulzim Zeneli, i cili ka qenë në garë për këtë pozitë por nuk është pranuar, përkundër se i plotësonte të gjitha kushtet. Senati i UP-së kishte vendosur që të anulojë konkursin për profesor-asistent, në të cilin kishte konkurruar edhe Zeneli, me arsyetimin se kandidati i propozuar nga komisioni recensues i fakultetit, Hamit Ismaili, nuk i plotësonte kushtet e kërkuara nga Statuti i UP-së.
Gjykata me aktvendimin e Departamentit të Përgjithshëm, Divizionit Civil me numër Cnr. 681/ 2017 që e posedon Gazeta Jeta në Kosovë, e ka urdhëruar UP-në të mos hapë konkurs të ri derisa të përfundojë shqyrtimi i ankesës së Zenelit.
“I caktohet masa e përkohshme e sigurimit, urdhërohet kundër propozuesit Universitetit të Prishtinës ‘ Hasan Prishtina’ në Prishtinë që të mos shpallet konkurs për vendin e punës në të cilin ka aplikuar paditësi Lulzim Zeneli sipas konkursit të publikuar në Gazetën Koha Ditore me datën 14.01.2017 deri në shqyrtim të kësaj çështjeje”, thuhet në aktvendimin e Gjykatës Themelore të Prishtinës, i marrë nga gjyqtarja Mihane Ismaili.
Në aktvendimin e siguruar nga Gazeta Jeta në Kosovë thuhet se deri te kjo masë ka ardhur pas shqyrtimit të provave të rastit të Lulzim Zenelit.
Gjyqtarja e rastit, Mihane Ismaili me këtë aktvendim, ka treguar arsyet për vendosjen e masës së përkohshme të sigurisë për UP-në.
“Gjykata pas analizimit dhe vlerësimit të provave që gjenden në shkresat e lëndës, erdhi në përfundim se propozimi i propozuesit për caktimin e masës së përkohshme, është i bazuar nga fakti se ekziston rreziku që pa caktimin e masës së sigurisë do të vështirësohet dukshëm realizimi i kërkesës nga palët”, thuhet në aktvendim të Gjykatës Themelore në Prishtinë.
Në këtë hulumtim shihet që Komisioni Recensues dhe Këshilli i FSHMN-së kishin përzgjedhur kandidatin Hamit Ismaili për pozitën profesor-asistent pa plotësuar kriteret e Statutit të UP-së për çka kërkohet punim shkencor me impakt-faktor si autor i parë. Komisioni Recensues dhe Këshilli i FSHMN-së nuk e kishin përzgjedhur kandidatin Lulzim Zeneli, i cili i plotësonte kushtet e këtij konkursi.
Ndryshe, Gazeta Jnk, gjatë hulumtimit pati vënë në pah që edhe pse ka pasur një vendim të Komisionit për Ankesa dhe Parashtresa të UP-së se Senati ka shkelur procedurat e konkursit, këta të fundit më 31 janar 2017 patën marrë vendim për rishpallje të konkursit.
Me aktvendimin e Gjykatës Themelore të Prishtinës, UP-ja obligohet të mos e shpallë konkursin për profesor-asistent në FSHMN.