Gjykata në Shkup ka vendosur mos ta ekstradojë ish-ushtarin e UÇK-së, thotë MPJD

Paneli i Gjykatës Themelore Penale në Shkup ka marrë vendim për mosekstradimin e shtetasit kosovar, Blerim Ramadani, i arrestuar më 17.07.2024 në Maqedoni të Veriut me fletarrest të Serbisë të lëshuar rishtazi nga Interpol.

Kështu ka njoftuar Ministria e Punëve të Jashtme dhe Diasporës e Republikës së Kosovës.

“Ramadani do të vazhdojë qëndrimin në arrest shtëpiak në Shkup deri në verdiktin final (ex officio) të Gjykatës Supreme të Republikës së Maqedonisë së Veriut”- njofton Ministria e Jashtme.

Kryeministri Albin Kurti kishte thënë se në takimin me homologun e tij maqedonas, Hristijan Mickoski, e ka diskutuar edhe çështjen e arrestimit të ish ushtarit të UÇK-së, Blerim Ramadani, 

“Nuk ka çështje ose temë të rëndësishme që nuk e kem diskutuar. Unë jam optimist për të ardhmen, nuk është rasti i parë që na ndodhë kjo dhe besojë që aktgjykimet e Gjykatave në Maqedoni të Veriut nga e kaluara tregojnë qartë rrugën që do të ecim në të ardhmen”- tha Kurti më 05.08.2024.

Ish-ushtarit të Ushtrisë Çlirimtare të Kosovës, Blerim Ramadani, i ishte  caktuar masa e paraburgimit prej 30 ditësh, me vendim të Gjykatës Themelore në Shkup.

Blerim Ramadani, ish-anëtar i Zonës Operative të Nerodimes të UÇK-së, ishte arrestuar më 17.07.2024 nga Policia e Maqedonisë së Veriut bazuar në një fletarrestim të lëshuar nga Serbia.