Gjobitet qytetari që tentoi të heqë pengesën të shtegu i çiklizmit
Inspeksioni komunal i kryeqytetit ka gjobitur qytetarin i cili shihej teksa mundohej të heqë pengesat e vëna në shtegun e çiklizmit me anë të një kazme.
Drejtori i Inspeksionit në Komunën e Prishtinës, Adonis Tahiri ka njoftuar se për shkak të tentativës së tij, ai është gjobitur me 100 euro.
“Pengesa e verdhë, nuk u largua”, ka shkruar shkurt në rrjetin social “Facebook”, duke bashkangjitur dokumentacionin e gjobës.
Një qytetar është xhiruar teksa mundohet të largojë pengesat e vëna në shtegun e çiklizmit me anë të një kazme.
Këto pamje janë postuar edhe nga Kryetari i Komunës së Prishtinës, Shpend Ahmeti në rrjetin Facebook.
Kryetari Ahmeti ka kujtuar se kjo është vepër penale.
“Pse mor vlla? Çka po të pengon? Goxha ndërmarrje me gjet kazmën e me u mundu me prish diçka. A pe sheh qe je në kamerë tash? A e din që është vepër penale kjo?,” ka shkruar Ahmeti.
Shtegu i çiklizmit është keqpërdorur edhe nga makina të cilat e kanë shfrytëzuar si parkim këtë pjesë.
Komuna ka në plan që të shtrojë rreth 35 km shtigje çiklizmi në Prishtinë dhe përreth.