Gjobë ndaj shoferit që bëri tejkalim të kolonës së automjeteve në Ferizaj

Policia e Kosovës e ka gjobitur një shofer pasi ka bërë tejkalim të kolonës në Ferizaj.

Policia e stacionit në Ferizaj ka njoftuar se më 17.09.2024 rreth orës 19:00 ka pranuar një informatë (me foto) nga qytetarët, se në rrugën “Reçaku” në Ferizaj një shofer i veturës të tipit “Mercedes” ka bërë tejkalimin e kolonës së automjeteve duke i rrezikuar pjesëmarrësit tjerë në komunikacionin rrugor.

Sipas njoftimit, Policia e ka identifikuar shoferin H.G (M/K) i moshës 73-vjeçar, të cilit i shqiptoi një gjobë për kundërvajtje sipas ligjit të komunikacionit rrugor, me dënim 200 euro, 2 pikë negative dhe masën mbrojtëse, heqje e patentë shoferit për 3 muaj.

“Me këtë rast Policia Rajonale në Ferizaj apelon tek shoferët e automjeteve që të respektojnë  shenjat dhe rregullat e komunikacionit. Veprimet e tilla rrezikojnë direkt jetën e tyre dhe pjesëmarrësve tjerë në komunikacion dhe fton qytetarët të bashkëpunojnë me policinë”- apelon Policia.

“Për të gjitha kundërvajtjet që mund të shkaktohen në komunikacion, të njoftojnë menjëherë policinë, stacionin më të afërt, apo përmes aplikacionit digjital ‘’Lajmëro Policinë ‘’ dhe në numrat kujdestarë : 192 ,0290/326-250 & 0290/322-406.Të dhënat e juaja do të ruhen në konfidencialitet të plotë”- thekson më tej PK-ja.