Gjoba 4 milionë euroshe, reagon Shoqata e Naftarëve
Shoqata e Naftarëve të Kosovës e ka kundërshtuar dhe e ka quajtur arbitrar vendimin e Autoritetit Kosovar të Konkurrencës për gjobitjen e 14 kompanive të derivateve të naftës me mbi 4 milionë euro për çrregullim të konkurrencës në treg gjatë muajve nëntor dhe dhjetor të vitit 2018.
“Shoqata e Naftarëve të Kosovës kundërshton fuqishëm vendimin e AKK për shqiptimin e masave ndëshkuese administrative ndaj 14 kompanive të derivateve të naftës, duke e cilësuar si vendim arbitrar”, thuhet në njoftimin e kësaj shoqate.
Shoqata deklaron se nuk ka patur asnjëherë marrëveshje për çmimin e naftës në mes të operatorëve të këtij sektori dhe se marrja e këtij vendimi është e bazuar kryesisht në insinuata.
“AKK me 6 maj 2020 ka vendosur t’iu shqiptojë masë ndëshkuese administrative në shumë prej 4,040,450.78 të totalit të të hyrave gjatë 6 mujorit të vitit 2018 të 14 kompanive nën hetim”, thuhet në vendimin e AKK-së.
Kompanitë e derivateve të cilat janë gjobitur janë: NTP Ibrahimi – 33,640 euro, Patroni – 38,276 euro, Veda 2 – 46,531 euro, Alba Petrol – 49,293 euro, Lab Oil – 55,175 euro, Benita Company – 58,450 euro, Fat Oil – 101,169 , Petrol Oti Slovenia – 117,875 euro, Petrol Company – 191,535 euro, Alfa Trade ShPK – 213,782 euro, Ipkos 498,338 euro, EXFIS – 537,899 euro, Al Petrol – 989,493 euro dhe HIB Petrol – 1,108,988 euro.
AKK i ka urdhëruar kompanitë në procedurë që të ndalojnë çdo veprim të mëtutjeshëm i cili ka të bëj me përcaktimin e çmimeve në mënyrë të bashkërenduar nëpërmjet çfarëdo marrëveshje apo bashkëpunimi tjetër joformal i cili shkon në dëm të konsumatorit si dhe çdo aktivitet biznesor që e çrregullon konkurrencën në tregun përkatës.
Nga të gjitha rastet e hetuara ka marrë dy vendime liruese për kompanitë, Blu Oil ShPK dhe Kastrati Group ShPK, kjo ka ndodhur meqë gjatë shqyrtimit të fakteve është vlerësuar se nuk ka argumente për të vazhduar më tutje procedurën hetimore, pasi që këto ndërmarrje nuk kanë shitur derivate me pakicë por vetëm me shumicë.
Hetimi lidhur me këtë rast ka filluar në fillim të vitit 2019, kur ishin ngritur dyshimet se operatorët e shitjes me pakicë të derivateve të naftës nuk kishin reflektuar në mënyrë individuale me rastin e caktimit të çmimeve gjatë muajve nëntor dhe dhjetor të vitit 2018.
KALLXO.com në fund të vitit 2018 kishte raportuar në lidhje me dyshimet për fiksimin e çmimit të naftës.
Çmimet e naftës në bursën ndërkombëtare kishin rënë për 40 për qind nga fillimi i muajit tetor 2018, por kjo nuk ishte reflektuar në tregun e Kosovës.
Ulja e ngadalshme e çmimit të naftës e kishte alarmuar Autoritetin e Konkurrencës, i cili dyshoi për marrëveshje në mes të naftëtarëve për mbajtjen e çmimeve në nivel të lartë.
