Jeta ne Komnune - Asambliste e komunes se Gjakoves - Ardian Gjini - Foto: Fatrion Ibrahimi
Gjini përplaset me Mimoza Shalën për prerjen e drurëve në qendër të Gjakovës
Në debatin “Jeta në Komunë” përballë Jeta Xharrës, kryetari i Gjakovës, Ardian Gjini, foli edhe për ambientin dhe të rinjtë e kësaj komune.
Kryetari Gjini tash e dy muaj pavarësisht kundërshtimit të qytetarëve ka filluar projektin për rrugën “Nënë Tereza”. Ai ka prerë edhe pemët në këtë rrugë.
Ai tha se kjo rrugë si rrugë kryesore e qytetit nuk ka pasur kurrfarë karakteri deri më tani, pa estetikë dhe me drurë të kalbur dhe jokualitativë.
Një gjë të tillë e kundërshtoi asamblistja e Vetvendosjes, Mimoza Shala.
“156 drunj i ke shkulë përgjatë rrugës “Nënë Tereza”. Përderisa në krejt vendet e botës qendrat lirohen për këmbësorë e mbyllen për makina plus trotuari u përgjysmu”, i tha asamblistja Shala kryetarit Gjini.
Shala tha se Komuna i ka shantazhuar përmes inspektorëve edhe bizneset pranë kësaj rruge dhe se kjo çështje është çështje tenderësh.
“Ti ke shkelë çdo procedurë, nuk ke mbajtë debat publik, nuk ke sjellë projekt, të hyrat po rriten me leje të ndërtimeve e buxheti i Komunës është i fokusuar në asfalt, asfalt, asfalt”, tha Mimoza Shala.
Përveç kësaj, edhe Këshilli Rinor i Veprimit Lokal ka një mungesë të objektit për zhvillimin e aktiviteteve të tyre.
Eda Haxhikadrija nga ky Këshill tregon se kanë bërë një kërkesë në Komunë për ndërtimin ose dhënien e një objekti të qendrës rinore, mirëpo të njëjtit ende nuk kanë arritur ta realizojnë kërkesën e tyre.
Kundrejt kësaj kërkesë nga të rinjtë e Gjakovës, kryetari Ardian Gjini tha se ka gjasa që ish-këshilli i vjetër do të renovohet dhe shndërrohet në një qendër rinore deri në vitin tjetër.
“Nëse kanë pritë që 20 vite ju lutem që të pritni edhe 9 muaj, për sigurimin e hapësirës”, replikoi Gjini.
Ndërsa, Ideal Zhaveli kryetar në Këshillin Rinor të Veprimit Lokal tha se ata janë ende pa shtëpi dhe i njëjti kërkoi nga kryetari që të ketë një kontakt të vazhdueshëm me të rinjtë.
Të ftuar në studio janë edhe tre asamblistë, dy prej tyre nga opozita, Ali Tafarshiku nga Alternativa, Mimoza Shala nga Vetëvendosje dhe Shpend Kumnova nga AAK-ja, ndërsa në Zoom Ideal Zhaveli nga Këshilli Rinor i Veprimit Lokal- KVRL.
