Gjilan, ndalohet një person, po kontrabandonte 7 gjedha me furgon

Policia e Kosovës, respektivisht patrulla e stacionit policor për mbikëqyrje kufitare në Zhegër (DRK-Lindje), rreth orës 14:00 gjatë vëzhgimit ka arritur të identifikojë dhe të ndalojë një automjet me targa të Kosovës të cilin e drejtonte një person i dyshuar.

Sipas njoftimit nga Policia, gjatë kontrollit është konstatuar se në automjetin furgon janë gjetur 7 krerë gjedhe (kafshë), dhe dyshohet se janë kontrabanduar në territorin e Kosovës nga Maqedonia e Veriut përmes rrugëve ilegale.

Lidhur me rastin është konsultuar edhe prokuroria dhe inspektorët e AUV-it.

“Rasti është trajtuar në koordinim me prokurorinë dhe Inspektorët AUV-it, përderisa pas hetimeve preliminare iu adresohet Doganave të Kosovës”, thuhet në njoftimin e Policisë.