Gjendja pas vërshimeve në fshatin e Gjilanit

Fshati Livoç i Epërm në komunën e Gjilanit ka qenë një nga zonat e prekura nga vërshimet si pasojë e reshjeve të shumta të shiut e borës që ndodhën ditëve të fundit në Kosovë.

Ky fshat gjendet në afërsi edhe të liqenit artificial i cili dje pati ngritje të nivelit të ujit për shkak të vërshimeve.

KALLXO.com ka siguruar disa fotografi të fshatit pas vërshimeve.

Gjatë ditës së sotme situata me vërshimet është qetësuar.

Nga vërshimet sipas fotografive shihet se mbeturinat kanë dalë jashtë rrjedhës së përrockës ndërsa uji i cili kalon përmes përrockës është qetësuar dhe është kthyer në shtrat.

Ekipe të shumta të emergjencës komunale por edhe ekipet e zjarrfikësve kanë dalë në terren për të pastruar zonat e prekura nga vërshimet.

Drejtori për Mbrojtje dhe Shpëtim, Sami Spahiu në një intervistë për KALLXO.com ka thënë se situata është vënë në menaxhim ndërsa po punohet për të larguar grumbullimin e ujërave nga prona të ndryshme.

Tutje Spahiu tha se dëmet janë të mëdha por ende nuk ka ndonjë shifër të përafërt se sa mund të jetë i gjithë dëmi i shkaktuar nga vërshimet.

Spahiu tregoi për KALLXO.com se 24 persona janë evakuar nga shtëpitë e tyre për shkak të përmbytjeve.

Personat e evakuuar janë dërguar në strehim te familjarët e tyre.