Vërshimet në Malishevë
Gjendja nga vërshimet në Malishevë, flet drejtori komunal
Si pasojë e reshjeve të dendura të shiut, disa komuna sot në Kosovë po përballen me vërshime të mëdha.
Komuna e Malishevës është një nga komunat më të prekura nga përmbytjet.
Drejtori për Mbrojtje dhe Shpëtim në këtë komunë, Shqipron Shala ka thënë se pas orës 12:00 të ditës, për shkak të reshjeve të shiut gjendja ka filluar të keqësohet.
Në një prononcim për KALLXO.com, Shala bëri të ditur se të gjitha ekipet e intervenimeve janë në terren dhe se Policia ka dalë në vendet ku kalueshmëria e veturave haset në vështirësi.
“Gjendja pas orës 12:00 të ditës, për shkak të reshjeve të shiut ka fillu të keqësohet, të gjitha ekipet e intervenime janë në teren, gjithashtu Policia ka dalë në vendet ku kalueshmëria e veturave haset në vështirësi”- ka deklaruar Shala për KALLXO.com.
Ai thotë se deri më tani vetëm një rrugë është ndaluar për të kaluar veturat e që është rruga që të shpie në fshatin Gurbardh, ku sipas tij lumi “Mirusha” ka kaluar mbi urë.
“Deri tani vetëm një rrugë është e ndaluar për të kaluar veturat, rruga që shpie për në fshatin Gurbardh, konkretisht lumi Mirusha ka kaluar mbi urë”- konfimron Shala.
Drejtori tha se deri më tani nuk kanë pasur thirrje nga ndonjë familje për evakuim.
“Deri tani nuk kemi pasur thirrje nga ndonjë familje për evakuim. Si pasojë e erërave te forta gjatë natës së mbrëmshme ka pasur dëme të konsiderueshme të kulmeve”- ka përfunduar Shala për KALLXO.com.
Në anën tjetër, Instituti Hidrometeorologjik i Kosovës ka njoftuar se reshjet e shiut do të vazhdojnë edhe gjatë ditës së nesërme.
KALLXO.com sot gjatë ditës ka raportuar për vërshime në komuna si Skenderaj, Vushtrri, Mitrovicë e Jugut, Pejë e Deçan.