Gazeta "Politico": Samiti për Demokraci, Biden s’e fton Kosovën
Gazeta amerikane “Politico” gjatë ditës së sotme ka publikuar listën e shteteve që janë ftuar të marrin pjesë në Samitin e Demokracive, i cili do mbahet në muajin dhjetor në ShBA.
Në hartën e shpërndarë për vendet që morën ftesë nga Ballkani Perëndimor, Kosova nuk është pjesë e listës.
Vendet me ngjyrë jeshile janë ato që kanë marrë ftesë për të qenë pjesë e Samitit për Demokraci, ndërsa ato me ngjyrë portokalli nuk kanë marr këtë ftesë.
Nga vendet e Ballkanit Perëndimor nuk morën ftesë Hungaria, Serbia, Bosnje Hercegovina dhe Kosova.
Madje, Hungaria është i vetmi shtet anëtar i BE-së që nuk ka marrë një ftesë të tillë pasi, sipas raportimeve, lideri i këtij vendi, Viktor Orban ka kontribuar në minim të demokracisë.
“Politico” shkruan se ndihmësit e Biden janë ende duke bërë agjendën për samitin virtual të 9-10 dhjetorit dhe shumë nga puna e tyre është konfidenciale.
“Lista e qeverive të ftuara nuk është bërë publike, megjithëse “Politico” arriti të marrë një përmbledhje të enjten. Planet janë të gjitha tentative dhe grupet e shoqërisë civile po ankohen se janë të margjinalizuar”, thuhet më tej nga “Politico”.
Nikoqir i këtij samiti që do mbahet në datat 9 dhe 10 dhjetor pritet të jetë presidenti i ShBA-së, Joe Biden.
Sipas të dhënave të Politico, ky samit do kulminojë me një takim tjetër në vitin 2022 ku do diskutohen të arriturat e samitit të këtij viti.
Këtu gjeni listën e vendeve që janë ftuar për të qenë pjesë e këtij samiti.