Gastronomët kundër masave të qeverisë: Gjendja është përkeqësuar edhe në ekonomi, edhe në shëndetësi

Shoqata e Gastronomëve të Kosovës përmes një deklarate ka reaguar lidhur me paralajmërimin se mund të ketë një mbyllje totale.

Ata në njoftim kanë theksuar se masat që janë marrë deri tani vetëm e kanë bërë më keq situatën me COVID-19.

Gastronomët kanë bërë të ditur se vetëm në tremujorin e dytë të këtij viti krahasuar më atë të viti paraprak ka pasur rënie deri në 64%, si asnjë sektor tjetër në Kosovë, kurse 36 % e bizneseve janë detyruar të largojnë punëtorë nga puna.

Largimet nga puna sipas gastronomëve do rriten nëse vazhdohet me këto rrethana.

Gastronomët tutje i kanë bërë thirrje qeverisë që të mos diskutojë mbylljen totale pa plan për mbështetje financiare.

Madje gastronomët thonë se qeverisë duhet t’i vijë turp pasi pjesa më e madhe e infektimeve është nga institucionet e jo nga bizneset e tyre.

Më poshtë keni reagimin e plotë të shoqatës së gastronomëve:

“Të shqetësuar nga rezultatet jopremtuese nga masat e fundit të aplikuara nga ana e QK-së, që nga data 13 nëntor e deri më sot, jemi dëshmitar që lakorja e infeksionit COVID-19 vetëm është përkeqësuar. Më shumë se kjo, kemi rritjen e lakores së dëmit ekonomik, e cila çdo herë e më shumë po thellohet.

Këto politika që nga fillimi i pandemisë e deri më tani, është evidente që nuk po arrijnë qëllimin e tyre, përkundrazi të pamenduara dhe shumë të rrezikshme për vendin, që do ti lëjnë gjurmët e pasojat e tyre për një kohë të konsiderueshme edhe pas pandemisë.

Sa i përket ndikimit të pandemisë dhe masave të QK në aspektin ekonomik, tashmë është evidente që sektori i gastronomisë është më i godituri në vend. Sipas të dhënave të Agjensionit Statistikor të Kosovës (ASK), të hyrat dhe qarkullimi i sektorit të gastronomisë në krahasim me vitin 2019 dhe 2020, vetëm në tremujorin e dytë (TM2), rezultojnë të kenë pasur rënie prej 64%, si asnjë sektor tjetër në Kosovë.

Nga dy sondazhe të bizneseve dhe punëtorëve të raportit hulumtues të ndikimit të pandemisë në gastronomi të përgaditur nga SHGK dhe Korb Marketing&Research, kemi të raportuar që 36% e bizneseve të gastronomisë, janë detyruar që të largojnë nga puna punëtorët e tyre si pasojë e zvogëlimit të vëllimit të ushtrimit të veprimtarisë dhe problemeve të likuiditetit.

Nëse kjo atmosferë e shkaktuar ekonomike vazhdon edhe më tutje, bizneset nuk mund ta mbijetojnë këtë situatë dhe 56% e tyre kanë raportuar që do të largojnë edhe më shumë staf nga puna.

Në këto rrethana, urgjentisht ju bëjmë thirrje që këto masa të hiqen, si jo efektive, e aq më pak të mendohet mbyllja totale pa ndonjë plan për mbështetjen financiare në ekonomi.

Për më tepër rreth COVID-19, mos të harrojmë që përhapja më e madhe e infeksionit ndodhë në hapësirat e institucioneve publike të cilat nuk i respektojnë masat parandaluese, nuk inspektojnë hapësirat e tyre të brendshme, por që kanë fokus primar dënimin e bizneseve private dhe këmbësorëve, duke shkaktuar papunësi të madhe në sektorin privat, derisa bëjnë çmos për të garantuar që pagat dhe mëditjet e tyre të mos u preken.

Për të përfunduar, të gjitha këto dhe i tërë serioziteti i kësaj çështjeje, përveç tjerash shpjegohet më së miri me mesazhin që kemi kuptuar të gjithë me turmat e pakontrolluara të njerëzve, mbledhjet, organizimet dhe fushatat e padinjitetshme të politikanëve në zgjedhjet e fundit në Podujevë, etj.

Pra, Ky është shembulli që marrim në këtë kohë krize e fatkeqësie!

Turp ju qoftë!”