Fushë Kosovë, Policia arreston një grua që u raportua se i dëmtoi tri vetura

Një grua në Fushë Kosovë është raportuar në Polici se i ka dëmtuar disa vetura, më 08.08.2024.

Këtë e ka konfirmuar për KALLXO.com, zëdhënësja e Policisë së Kosovës, Flora Ahmeti.

Sipas Ahmetit, e dyshuara ka dëmtuar tri vetura në rrugën “Xhemajl Mustafa”.

Pasi është arrestuar nga Policia, e dyshuara është dërguar në Qendrën Klinike Universitare të Kosovës për trajtim mjekësor, pasi thuhet se është lënduar.

“Rreth orës 10:00, kemi pranuar informatën për dëmtimin e tri automjeteve në rrugën Xhemajl Mustafa në Fushë Kosovë. Policia menjëherë ka arrestuar personin e dyshuar, e cila është dërguar në QKUK, për trajtim mjekësor (është lënduar) dhe ekzaminim psikiatrik” – ka thënë Ahmeti, më 08.08.2024.

Ahmeti ka njoftuar se ndaj të dyshuarës B. M., është hapur rast për veprën penale “Asgjësimi apo dëmtimi i pasurisë”.

“Pas përfundimit të trajtimit mjekësor, do të kryhen procedurat e nevojshme hetimore në koordinim me Prokurorinë” – ka shtuar Ahmeti.