Funksionalizohen semaforët në qytetin e Mitrovicës

Semaforët e vendosur në disa pjesë të qytetit të Mitrovicës që ishin jofunksionalë për disa vjet, kanë nisur të ‘ndriçojnë’.

Këtë e ka bërë të ditur komuna e Mitrovicës përmes një komunikate.

“Në kuadër të prioriteteve në përmirësimin e jetës së qytetarëve, Drejtoria për Shërbime Publike dhe Infrastrukturë ka përfunduar me implementimin e projektit për vendosjen e semaforëve në qytetin e Mitrovicës”, thuhet në njoftimin e komunës.

Semaforët janë vendosur në tri pikat më kryesore të qytetit tek ish-hotel Adriatiku, vendkalimi i hekurudhës (rruga “Shemsi Ahmeti”) dhe stacioni i Autobusëve.

KALLXO.com kishte raportuar para disa muajve për mosfunksionimin e semaforëve në qytetin e Mitrovicës dhe vështirësit që kishin qytetarët gjatë qarkullimit.

Naser Muja, drejtor për Shërbime Publike në komunën e Mitrovicës, kishte thënë për Kallxo se deri në fund të viti do të bëhej fuunksionalizimi i këtyrë seamforëve.

Mitrovica me semaforë jofunksional, komuna premton zgjidhje brenda vitit

Muja gjatë inspektimit të punimeve tha se ky projekt është tejet i rëndësishëm, pasi që do të mundësoj një qarkullim më të mirë të automjeteve dhe qytetarëve në qytet.

“Janë tri pika në fillim dhe në të ardhmen besoj se do të vendosen edhe në pika të tjera, sipas nevojës”, tha drejtori Muja.

Po ashtu drejtori Muja bën apel tek Policia e Kosovës të ndërmarrin aksion për largimin e automjeteve të cilat parkohen afër semaforëve dhe pengojnë komunikacionin.

Nga ana tjetër, qytetarët mitrovicas e kanë mirëpritur realizimin e këtij projekti duke e konsideruar si të domosdoshëm për qytetin e Mitrovicës, në të njëjtën kohë ata kanë falënderuar drejtorin Muja për angazhimin e tij të palodhshëm në krijimin e kushteve dhe sigurimin e një jete dhe mirëqenie më të mirë për qytetarët.