FSK kryen ushtrimin fushor më të madh ndonjëherë, prezentë edhe presidentja Osmani e kryeministri Kurti

Forca e Sigurisë së Kosovës (FSK) ka përfunduar ushtrimin “Ujku i Çeliktë”, që siç tha ministri i Mbrojtjes, Ejup Maqedonci, është më i madhi i realizuar ndonjëherë nga Ushtria e Kosovës dhe u krye me sukses të lartë nga mbi 1 mijë ushtarë.

Për ta parë këtë ushtrim, prezentë ishin edhe dy krerët e shtetit, presidentja Vjosa Osmani dhe kryeministri Albin Kurti.

“Me anë të këtij ushtrimi gjithashtu është validuar regjimenti i dytë i komandës së forcave tokësore të cilët janë në gjendje të kryejnë detyra të veçanta dhe komplekse me efikasitet të lartë” – ka shkruar ministri Maqedonci në Facebook.

Kryeministri Kurti ka mbajtur një fjalim, me ç’rast shprehu mirënjohje e krenari për ushtarakët e FSK-së.

“Ushtrimi “Ujku i Çeliktë” nuk është thjeshtë një ushtrim i radhës, por një ushtrim që tregon shpirtin tuaj luftarak për të përballuar sfidat e nga sfidat ju gjithnjë keni dalë më të përgatitur e më të fortë, ashtu siç ka dalur edhe populli, shoqëria dhe kombi ynë” – tha ai.

Siç ka njoftuar FSK-ja, komandanti Bashkim Jashari ka pritur në këtë ushtrim edhe deputetë e përfaqësues të ambasadave, KFOR-it, atashe të mbrojtjes e përfaqësues ushtarakë nga vendet partnere.