Francë, sot mbahet rundi i dytë i zgjedhjeve presidenciale
Votuesit francezë sot me mëngjes u janë drejtuar qendrave të votimit, për të vendosur nëse do t’i japin Emmanuel Macron pesë vjet të tjera si president, ose do ta zëvendësojnë atë me kandidaten e ekstremit të djathtë, Marine Le Pen.
Pas një fushate zgjedhore përçarëse, Le Pen përballet me një betejë të vështirë me kundërshtarin e saj 44-vjeçar, raporton BBC.
Për të fituar, të dy duhet të tërheqin votuesit që mbështetën kandidatët e tjerë në raundin e parë. Por këto janë dy figura polarizuese në Francë dhe abstenimi është një faktor kyç.
Kundërshtarët e Macron e quajnë atë arrogant dhe president të të pasurve, ndërsa Le Pen, është akuzuar se ka lidhje me presidentin rus Vladimir Putin.
Macron u ngrit në pushtet me një premtim të furishëm ndryshimi, por shumë ankohen se ende nuk e kanë parë atë. Presidenca e tij është goditur nga protestat, pandemia Covid dhe tani kostoja në rritje e jetesës.
Ndërkohë, Marine Le Pen ka mësuar nga gabimet që bëri kur u mund nga i njëjti kundërshtar në raundin e dytë në vitin 2017. Kjo është animi i saj i tretë në presidencë dhe nëse dështon mund të jetë e fundit për të.
E panjohura e madhe në këto zgjedhje është se sa votues do të refuzojnë të mbështesin asnjërin kandidat, qoftë duke hedhur një fletë të bardhë apo duke mos dalë fare. Pjesa më e madhe e Francës është me pushime dhe pjesëmarrja mund të jetë historikisht e ulët.
Fushata ka qenë e shkurtër, por zgjedhja për votuesit është e qartë, midis një presidenti pro-evropian dhe një kandidati nacionalist që kërkon të ndalojë shaminë dhe të kufizojë imigracionin.
Vendvotimet u hapën në orën 08:00 (06:00 GMT) dhe votimi do të përfundonte rreth 12 orë më vonë.
Cilido qoftë rezultati, Macron do t’u drejtohet votuesve të dielën në mbrëmje nga një skenë në këmbët e Kullës Eiffel./BBC