FOTO: Serbët mbajnë të bllokuara rrugët dhe protestojnë edhe në mot me shi
Janë bërë më shumë se 10 orë që qytetarët e veriut kanë bllokuar rrugët në afërsi të pikës kufitare në Jarinje.
Ky bllokim vjen në shenjë pakënaqësie pasi Qeveria e Kosovës ka vendosur masë reciprociteti ndaj Serbisë për targat e automjeteve.
Protestuesit nuk po shpërndahen ndonëse në zonë po bie shi.
KALLXO.com është duke qëndruar në vendin e ngjarjes qysh nga orët e hershme të mëngjesit.
Sipas vendimit të Qeverisë së Kosovës, veturat që hyjnë nga Serbia duhet të pajisjen me targa të përkohshme në pikëkalimet kufitare të Kosovës.
Këto targa të përkohshme po u vendosen veturave në xhamat para dhe prapa.
Qeveria e Kosovës ka thënë se të gjithë shoferët me targa të lëshuara nga Serbia duhet të paguajnë 5 euro për targa të përkohshme dhe vlefshmëria e tyre është 60 ditë.
Ndërsa, ministri i Punëve të Brendshme, Xhelal Sveçla, sot në një konferencë për media ka thënë se lidhur me operacionin e sotëm në veri të vendit institucionet e Kosovës kanë pasur bashkëbisedim dhe koordinim me aleatët.
Kurse, për bllokimin e rrugëve nga ana e serbëve tha se ata janë të sigurt dhe u ka bërë thirrje mos t’i bllokojnë rrugët.
Reagim në lidhje me këtë çështje ka pasur sot nga ana e Shteteve të Bashkuara të Amerikës që kanë bërë thirrje për ulje të tensioneve.