FOTO - Kallashnikovët që u sekuestruan në aksionin e Policisë dhe Prokurorisë Speciale

20 kallashnikovë janë sekuestruar gjatë një aksioni të gjerë të Policisë së Kosovës nën urdhrat e Prokurorisë Speciale të dielë që lamë pas.

Përveç kallashnikovëve, policia kishte sekuestruar edhe 20 karikatorë të këtyre armëve automatike, dy vetura, disa telefona e disa dokumente të cilat do të trajtohen gjatë ditëve e javëve në vijim për hetim të rastit për të cilin u zhvillua aksioni policor.

Pesë persona po dyshohen për trafikim me armë ndërsa bastisjet dhe operacioni u zhvillua në pesë lokacione, më saktësisht në Prishtinë dhe Mitrovicë Jugore.

Pesë të arrestuarit sipas Prokurorisë Speciale po dyshohet si grup i rrezikshëm kriminal.

Ndaj tyre janë ngritur dyshimet se kanë kryer veprat penale pjesëmarrje dhe organizim i grupit kriminal si dhe import, eksport, furnizim, transportim, prodhim, këmbim, ndërmjetësim ose shitje e paautorizuar e armëve apo materialeve plasëse.

Këtyre veprave penale u shtohet edhe ajo e mbajtjes në posedim të armëve pa leje.

Pesë të arrestuarit kanë inicialet, S. S., S. S., E. Xh., Sh. D. dhe Sh. J.

Me vendim të prokurorit kompetent pesë të dyshuarit e arrestuar janë dërguar në mbajtje për 48 orë, për të vazhduar me procedura të mëtejme ligjore.