Ferizaj, policët sulmohen gjatë detyrës, Gjykata vendosi për të dyshuarin

Dy policë kanë pësuar lëndime trupore pasi janë sulmuar derisa ishin në krye të detyrës.

Ngjarja ka ndodhur më 2 gusht.

Lidhur me këtë rast është ndaluar i dyshuari A.S., ndaj të cilit Gjykata e Ferizajt të mërkurën ka caktuar masën e paraburgimit.

Sipas njoftimit të Gjykatës, pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake i Divizionit Penal – Shabi Idrizi, ka vërtetuar faktin se ekziston dyshimi i bazuar mirë se i pandehuri më 02.08.2021, në Ferizaj ka sulmuar personat zyrtarë – policët gjatë kryerje së detyrës zyrtare, duke u shkaktuar lëndime trupore.

Sipas njoftimit, të dëmtuarit – policët B.V. dhe A.R.,  të cilët kishin qenë të angazhuar në planin operativ “Anti-Covid” dhe derisa ishin duke i larguar klientët nga një lokal, i  pandehuri fillimisht i kishte fyer, pastaj i kishte sulmuar fizikisht duke u shkaktuar lëndime trupore të përshkruara si në raporte mjekësore të Qendrës Emergjente në Ferizaj.

Gjyqtari i procedurës paraprake, kërkesën e prokurorit të shtetit për caktimin e masës së paraburgimit kundër të pandehurit e ka aprovuar si të bazuar.

Paraburgimi do të mbahet në Qendrën e Paraburgimit dhe nga aty dërgohet në Institutin e Fornezikës Psikiatrike në Prishtinë, me qëllim ekzaminimi psikiatrik dhe konstatim-observim të natyrës, llojit, shkallës dhe kohëzgjatjes së sëmundjes mendore, ndikimin që ka pasur gjendja mendore si dhe faktin se a e ka mundur ky i pandehur  për t’i kuptuar veprimet e tij në kohën e kryerjes së veprës penale më 03.08.2021, a është i aftë për ta mbrojtur veten të konsultohet me personat të tjerë, përkatësisht me mbrojtësin, aftësinë për ta kuptuar akuzën dhe a është i aftë për ta përballuar gjykimin.

Me këtë rast palët njoftohen se ankesa kundër këtij aktvendimi nuk e shtyn ekzekutimin e tij.