Ish-Presidenti i ShBA-së, Donald Trump FOTO-REL
Facebook duhet ta rishikojë bllokimin e Trumpit
Ndalimi i ish-presidentit amerikan, Donald Trump, nga Facebook-u dhe Instagram-i është mbështetur nga Bordi i Mbikëqyrjes i Facebook-ut.
Por, ai e kritikoi natyrën e përhershme të ndalesës, duke thënë se shkon përtej ndëshkimeve normale të Facebook-ut.
Bordi e urdhëroi Facebook-un që të rishikojë vendimin dhe “të justifikojë një përgjigje proporcionale”, që zbatohet për të gjithë, përfshirë përdoruesit e zakonshëm.
Trump është bllokuar nga Facebook-u dhe Instagram-i qysh në muajin janar, kur edhe kanë ndodhur trazirat vdekjeprurëse në ndërtesën e Kongresit.
Atëbotë, ai ka qenë president.
Bordi i Mbikëqyrjes tha se vendimi fillestar për të pezulluar përgjithmonë Trumpin ishte “i padefinuar dhe pa standarde” dhe se përgjigjja e saktë duhet të jetë “në përputhje me rregullat që zbatohen për përdoruesit e tjerë të platformës”.
Facebook duhet të përgjigjet brenda gjashtë muajve, tha Bordi.
Në përgjigje, Facebook tha se “do ta marrë parasysh vendimin e bordit” dhe se “do të ndërmarrë veprime të qarta dhe proporcionale”.
Trump, i cili është bllokuar edhe nga Twitter, ka nisur një faqe të re të martën për të njoftuar mbështetësit me mendimet e tij.
Në një postim të bërë pas vendimit të Bordit të Facebook-ut, ai edhe një herë pretendoi se ka pasur mashtrime në zgjedhjet presidenciale në SHBA më 2020 dhe i inkurajoi mbështetësit e tij që “të mos dorëzohen kurrë”./REL