Është vendosur pllakë e Departamentit të patentë shoferëve në ish-objektin e komunës paralele në Mitrovicë të Veriut

Në ish-objektin e komunës paralele të Mitrovicës së veriut është vendosur një pllakë e Departamentit të patentë shoferëve.

KALLXO.com ka siguruar pamje nga vendi i ngjarjes.

Më 30.08.2024, KALLXO.com ka raportuar se Policia e Kosovës ka mbyllur pesë objekte të strukturave paralele në veri të vendit.

Dje më 31.08.2024, KALLXO.com ka raportuar se është larguar flamuri serb nga objekti i strukturës paralele në “Lagjen e Boshnjakëve”.

Ministri i Administrimit të Pushtetit Lokal, Elbert Krasniqi ka njoftuar se të premten, më 30.08.2024, janë mbyllur institucionet paralele ilegale të vetëqeverisjes lokale, të cilat kanë funksionuar nën direktiva të Serbisë duke cënuar kushtetutshmërinë dhe ligjet e Republikës së Kosovës.

Si rrjedhojë, ministri Krasniqi ka bërë të ditur se cilat komuna paralele nuk do të operojnë më.

“Sot, pas një koordinimi të ngushtë në mes të institucioneve të Republikës së Kosovës, janë mbyllur institucionet paralele ilegale të Vetëqeverisjes Lokale, të cilat kanë funksionuar nën direktiva të Serbisë duke cënuar kushtetutshmërinë dhe ligjet e Republikës së Kosovës. Komunat paralele të cilat nuk do të operojnë më janë: Qarku i Mitrovicës së Kosovës, Komuna paralele e Mitrovicës, Komuna paralele e Zveçanit, Komuna paralele e Zubin Potokut dhe Komuna paralele e Leposaviqit” – ka shkruar ministri Krasniqi në Facebook, më 30.08.2024.

Sipas ministrit Krasniqi, pesë komunat paralele që ka përmendur se nuk do të operojnë më, do t’i bashkohen 7 komunave të tjera paralele të cilat u mbyllën në Prizren, Pejë, Suharekë, Istog, Klinë, Rahovec dhe Dragash.