Emergjenca tregon se cila është gjendja e dy të plagosurve në lagjen Arbëria

Një person ka vdekur dhe dy persona janë lënduar në një hotel në lagjen Arbëria në Prishtinë rreth orës 13:20. Të lënduarit dyshohet se janë plagosur me mjet të mprehtë.

Nga Qendra Klinike Universitare e Kosovës kanë njoftuar për KALLXO.com se gjendja e të plagosurve është stabile.

“Janë duke u trajtu në QKUK. Për momentin gjendja e tyre është stabile ndërsa do të vazhdojnë të trajtohen në Klinikën e Kirurgjisë Torakale”- ka thënë drejtori i Emergjencës në QKUK, Naser Syla.

Më herët, lajmin për rastin për KALLXO.com e ka konfirmuar zëdhënësja e Policisë për rajonin e Prishtinës, Flora Ahmeti.

Sipas saj, vdekjen e viktimës e ka konstatuar ekipi mjekësor në vend të ngjarjes.

“Sot rreth orës 13:20  policia ka marrë informatën për të shtëna  me armë zjarri, në lagjen Arbëria të Prishtinës, saktësisht në një hotel. Menjëherë në vendin e ngjarjes kanë dalë njësitet e nevojshme policore dhe ekipi mjekësor. Bazuar në të dhënat fillestare nga arma e zjarrit lëndime ka pësuar një person, i cili në vendngjarje ka ndërruar jetë, vdekjen e tij e ka konstatuar ekipi mjekësor”- ka thënë Ahmeti.

Ajo ka njoftuar se aktualisht hetuesit policor, në koordinim me prokurorin e shtetit  janë duke punuar për të ndriçuar dhe sqaruar të gjitha rrethanat që kanë të bëjnë me këtë ngjarje.