Edward Joseph thotë se në Uashington u diskutua ndarja e Kosovës, Thaçi e Grenell e mohojnë

Presidenti i Kosovës, Hashim Thaçi i ka reaguar profesorit amerikan Edward Joseph, i cili ka thënë se në Uashington është diskutuar ndarja e Kosovës. Ndaj kësaj deklarate ka reaguar edhe i dërguari i posaçëm i Shteteve të Bashkuara për dialogun Kosovë-Serbi, Richard Grenell.

Të dy këta i kanë cilësuar deklaratat lajme të rreme.

“Eshtë zhgënjyese të shohësh se si disa analistë mund të krijojnë me lehtësi planet e tyre trilluese (shkëmbim tokash, ndarje, autonomi) dhe t’ua atribuojnë atyre që po përpiqen të bëjnë një marrëveshje historike midis Kosovës dhe Serbisë. Përhapja e planeve dhe lajmeve të rreme nuk e ndihmojnë procesin”, ka shkruar Thaçi.

Javën e kaluar, presidenti i Kosovës Hashim Thaçi është takuar në Shtëpinë e Bardhë me homologun e tij serb Aleksandër Vuçiq, në praninë e Këshilltarit të Presidentit Trump për Siguri Kombëtare, Robert O’Brien dhe emisarit amerikan për dialogun Kosovë- Serbi, ambasadorit Richard Grenell.

Thaçi u shpreh se ky takim shënon kthimin e fuqishëm të ShBA-së në dialogun Kosovë-Serbi, por pa dhënë detaje tjera, ka mohuar se në atë takim është arritur ndonjë marrëveshje mes të dyja vendeve.

It’s disappointing to see how certain analysts so easily create their fiction plans (land swap, partition, autonomy) and attribute them to those who are trying to make a historic deal between #Kosova & #Serbia. Spreading fake plans & news won’t help this process. https://t.co/APOAEfC5kY

— Hashim Thaçi (@HashimThaciRKS) March 7, 2020

Ndërkaq, së fundi, profesori amerikan dhe njohësi i zhvillimeve në Ballkan Edward Joseph ka thënë se qëllimi i takimit në Uashington ishte të diskutohej një marrëveshje dy palëshe e bazuar në parimin e ndarjes së Kosovës.

Këto deklarata, Joseph i ka dhënë në një intervistë për Zërin e Amerikës.

Joseph, është shprehur i bindur që zgjidhja e mosmarrëveshjes mes dy palëve po shkon ndërmjet ndryshimeve, për të cilat Thaçi dhe Vuqiç pretendojnë se ishin pajtuar tashmë gjatë një dialogu të ndërmjetësuar nga ish-Përfaqësuesja e Lartë e BE-së, Federika Mogerini.

Sidoqoftë, pyetja është, siç thekson analisti amerikan, në favor të kujt do të arrihet një marrëveshje e tillë, Thaçi, Vuqiç dhe Shtetet e Bashkuara ose  nga ana tjetër, shqiptarë dhe serbë që jetojnë në Kosovë dhe Serbi.

Ndaj deklaratave të tij ka reaguar edhe emisari Richard Grenell, duke i quajtur “lajme të rreme”.

“Lajm i rremë. Kjo kurrë nuk është diskutuar në praninë time. Edward Joseph është i pamatur këtu”, ka shkruar Grenel në Twitter.

Fake News. This has never been discussed in my presence. @edwardpjoseph is reckless here. https://t.co/HL0T5sHSVc

— Richard Grenell (@RichardGrenell) March 7, 2020