Edhe dy muaj të tjerë paraburgim për Ilir Abdullahun - ‘Liza’, të dyshuarin në rastin e vrasjes së Triumf Rizës

Të dyshuarit në rastin e vrasjes së policit Triumf Riza në vitin 2007, Ilir Abdullahu, i njohur si Liza, i është vazhduar edhe për dy muaj masa e paraburgimit.

Këtë e ka konfirmuar për KALLXO.com, zëdhënësja e Gjykatës së Prishtinës, Mirlinda Gashi.

“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurit I.A, Gjykata Themelore në Prishtinë – Departamenti Special me datë 29.07.2024 ka marr Aktvendim dhe duke aprovuar kërkesën e Prokurorisë Speciale të Republikës së Kosovës, ashtu që masa e paraburgimit të pandehurit I.A iu është vazhduar në kohëzgjatje prej 2 (dy) muaj”- thuhet në përgjigjën e zëdhënëses së Gjykatës së Prishtinës, Mirlinda Gashi më 02.08.2024.

Për vrasjen e zyrtarit policor Triumf Riza që ndodhi në vitin 2007, Policia e Kosovës më 16.07.2023 e kishte arrestuar të dyshuarin Ilir Abdulluahu.  Abdulluahu ka qenë në kërkim 15 vjet nga organet e rendit, e arrestimi i tij kishte ndodhur më 16.07.2023 në Batllavë të Podujevës.

Ilir Abdullahu, i njohur si “Liza”, dyshohet për veprën penale vrasje e rëndë në bashkëkryerje, që kishte ndodhur më 30.08.2007 në Prishtinë, ku i vrarë kishte mbetur Triumf Riza, pjesëtar i Policisë së Kosovës.

Edhe në fillimi të muajit prill, Gjykata e Prishtinës kishte marrë vendim që Abdullahut, të dyshuar në rastin e vrasjes së Triumf Rizës, t’i vazhdohet edhe për dy muaj masa e paraburgimit.

Abdullahu, i njohur me nofkën “Liza”, ishte liruar nga paraburgimi nga Gjykata e Prishtinës pasi kishte dhënë 100 mijë euro dorëzani.

Gjykata e Apelit, më 03.11.2023 e ka kthyer në paraburgim Ilir Abdullahun, i dyshuar për vrasjen e policit Triumf Riza.

Në arsyetimin e Gjykatës së Apelit thuhej se në ankesën e Prokurorisë Speciale pretendohet se aktvendimi për masën e dorëzanisë është në shkelje të dispozitave të procedurës penale. Kjo për faktin se për caktimin e kësaj mase duhet të ekzistojë dyshimi i bazuar dhe se baza e vetme është rreziku i ikjes, andaj Prokuroria ka vlerësuar se nuk janë plotësuar kushtet ligjore për caktimin e masës së dorëzanisë ndaj të njëjtit.

Gjykata e Apelit kishte vlerësuar se ankesa e Prokurorisë Speciale është e bazuar dhe se Gjykata e shkallës së parë nuk ka dhënë arsye të mjaftueshme lidhur me proporcionalitetin dhe përshtatshmërinë e kësaj mase.

Andaj edhe zëvendësimi i masës së paraburgimit me masën e dorëzanisë në vlerë prej 100 mijë euro për të pandehurin nuk është i drejtë dhe i ligjshëm dhe se i pandehuri Abdullahu duhet të kthehet në paraburgim.

Gjykata Supreme e Kosovës e kishte vërtetuar vendimin e Gjykatës së Apelit që Ilir Abdullahun ta kthejë në paraburgim.

Gjykata Supreme e kishte refuzuar ankesën e avokatit të Abdullahut, Ramë Dreshaj, i cili kishte parashtruar ankesë kundër vendimit të Gjykatës së Apelit që të dyshuarin ta kthejë në masën e paraburgimit.

Për vrasjen e Triumf Rizës është dënuar Arben Berisha, kurse Enver Sekiraqa është duke u gjykuar ende për nxitje të vrasjes së Triumf Rizës.

Gjyqtari Agim Kuçi e kishte lënë të mbrohet në liri Enver Sekiraqën më 03.05.2024 kur edhe kishte shpallur dënimin ndaj tij me 25 vjet burg.

Kur ishte lënë në liri nga Kuçi, Prokuroria ishte ankuar në Gjykatën e Apelit. E njëjta kishte vendosur ndryshe nga shkalla e parë, pra që Sekiraqa të shkonte në paraburgim.

Më 31.05.2024, edhe Gjykata Supreme e Kosovës e ka vërtetuar vendimin e Gjykatës së Apelit me të cilën Enver Sekiraqës i ishte vendosur masa e paraburgimit.

Lidhur me heqjen e arrestit shtëpiak dhe lënien në liri të Sekiraqës, gjyqtarit Agim Kuçi i ishte shqiptuar masa e suspendimit deri në një vendim tjetër nga Këshilli Gjyqësor i Kosovës.

Në shpalljen e aktgjykimit  kur u dënua për herë të tretë me datë 03.05.2024, Sekiraqa nuk ishte prezent në sallë.

Kjo përbën herën e tretë që Sekiraqa dënohet për urdhërimin e vrasjes së Rizës 17 vite më parë. Për herë të parë në vitin 2016 Sekiraqa ishte dënuar me 36 vite burgim kurse sërish në vitin 2019 me 20 vite burgim.

Policia e Kosovës më 23.05.2024 ka kërkuar ndihmën e qytetarëve për gjetjen dhe arrestimin e Enver Sekiraqës, pasi që nga 17.05.2024 vazhdon të mbetet i paarritshëm për organet e rendit dhe drejtësisë.

Policia ka publikuar fotografinë e tij dhe të dhënat, duke e kërkuar si të dënuar për veprën penale “shtytje në kryerjen e vrasjes së rendë”, në rastin e vrasjes së policit Triumf Riza.

Dorasi i shpallur fajtor për vrasjen e Rizës është Arben Berisha, i cili për këtë vepër u dënua me 35 vjet burgim.