Edhe dy ftesa të reja nga Gjykata Speciale

Gjykata Speciale i ka dërguar ftesë për intervistim kryetarit të degës së OVL UÇK në Prishtinë, Fatmir Sopit si dhe veteranit Sejdi Veselit.

Lajmin për këtë ftesë e ka bërë të ditur Hysni Gucati, kryetar i Organizatës së Veteranëve të Luftës të UÇK-së, i cili ka thënë që të gjithë ata që janë ftuar deri më tani nga kjo gjykatë do të dalin faqebardhë.

“Sapo morra lajmin që Gjykata Speciale ka dërguar ftesë për anëtarin e Kryesisë njëherit kryetarin e degës së Prishtinës Fatmir Sopi dhe veteranin e UÇK-së Sejdi Veseli. Të gjithë ata që janë të ftuar do të dalin faqebardhë”, ka shkruar Gucati në facebook.

Prokuroria Speciale për krime të luftës në Kosovë, me seli në Hagë, që nga dhjetori i vitit 2018 e deri më tash, sipas të dhënave të Organizatës së Veteranëve të Luftës të Ushtrisë Çlirimtare të Kosovës, ka intervistuar rreth 100 persona, duke përfshirë edhe kryeministrin në largim Ramush Haradinaj i cili pikërisht për shkak të kësaj ftese ka dhënë dorëheqje.

Historiku i Gjykatës Speciale

Gjykata Speciale ishte miratuar më 3 gusht të vitit 2015 në Kuvendin e Kosovës, pas kërkesave të shumta nga ndërkombëtarët.

Me 82 vota për, 5 kundër dhe 1 abstenim, deputetët e asaj legjislature i kishin votuar ndryshimet e nevojshme kushtetuese të cilat i kishin hapur rrugë themelimit të kësaj gjykate të kërkuar nga bashkësia ndërkombëtare.

Në atë kohë, kryeministër kishte qenë Isa Mustafa, ndërsa zëvendëskryeministër Hashim Thaçi.

Ky i fundit kishte qenë shumë i zëshëm në mbështetjen e krijimit të kësaj Gjykate.

Gjykata Speciale për Kosovën në përbërjen e saj do të ketë vetëm prokurorë e gjykatës ndërkombëtarë.

Ajo ka filluar punën muajve të fundit, kur ka ftuar disa ish figura të larta të Ushtrisë Çlirimtare të Kosovës.

Lëvizja Vetëvendosje kishte qenë partia e vetme e cila unanimisht kishte votuar kundër krijimit të kësaj Gjykate, ndërsa nga partitë e tjera ka pasur disa figura të pakta që kanë votuar kundër.