Edhe 21 të arrestuar për aferën "Subvencionet 2021"

Edhe 21 persona janë arrestuar në lidhje me dyshimet për korrupsion në rastin e njohur për opinionin si “Subvencionet 2021”.

Këta persona u arrestuan në aksione të ndryshme në policisë në Prishtinë, Podujevë, Pejë, Gjilan dhe Istog.

14 prej tyre janë zyrtar të Agjencisë për Zhvillim të Bujqësisë dhe të tjerët zyrtarë të komunave të Kosovës.

Sipas prokurorit të rastit Rafet Halimi dëmi të cilin dyshohet se këta zyrtarë e kanë shkaktuar është mbi 1 milion euro.

“Aksioni do të vazhdojë edhe më tej. Vlera e dëmit e kalon vlerën 1 milion euro por vlera e saktë do të dihet pas ekspertizës”, tha prokurori.

Në lidhje me këtë aferë, muaj më parë u arrestuan 11 persona dhe u sekuestruan para të gatshme në vlerë mbi 600 mijë euro.

Një pjesë e këtyre parave sipas prokurorisë ishin gjetur në shtëpinë e vëllait të tij Salih Statovcit në Batllavë të Podujevës.

Atje ishin sekuestruar 406 mijë euro dhe mjete të tjera në valuta të ndryshme.

KALLXO.com e ka siguruar dosjen e prokurorisë së Prishtinës ku shfaqën edhe planet e zyrtarëve të Ministrisë së Bujqësisë për të marrë ryshfet gjatë vitit 2021.

Në dosjen të cilën e ka siguruar KALLXO.com thuhet se në zyrën e Statovcit përpos që është diskutuar për marrjen e ryshfetit nga aplikuesi V.K, janë thurur edhe plane për të marrë ryshfet gjatë vitit 2021.

Madje sipas Prokurorisë të dyshuarit Berat Nika dhe Hasan Maxharraj janë dëgjuar tek bëjnë plane që në vitin 2021 të marrin ryshfet shuma të parave prej 25 mijë eurove për aplikues.

Përpos Luan dhe Salih Statovcit të arrestuar deri më tani janë edhe zyrtari i pagesave direkte, Sadat Shkodra, zyrtari për zhvillimin e bujqësisë në Istog, Hasan Maxharraj, zyrtari i pagesave në AZHB Berat Nika, zyrtari për politika në Istog Kushtrim Zogaj dhe inspektorja e AZHB-së Adushe Ukshini.

Prokuroria pretendon se ka siguruar prova të fuqishme në këtë rast duke përfshirë  fotografi dhe incizime të momenteve të dorëzimit të parave.

Pos tjerash, Prokuroria pretendon se ka arritur të sigurojë prova ku shihet se Adushe Ukshini e cila është inspektore në AZHB ka pranuar shuma të ndryshme si ryshfet dhe të njëjtat shihet duke ia dërguar drejtorit Luan Statovci dhe duke i ndarë mes vete.

Gjatë bastisjeve janë sekuestruar rreth 433.160 euro, 600 dollarë, 200 franga, 275 lira turke, 15 telefona, 8 vetura, një kompjuter, pesë armë, një USB dhe një vulë.

Bastisje të mëdha u zhvilluan edhe gjatë ditës së djeshme në disa qytete të Kosovës ku cak ishin bujq të ndryshëm të cilët kishin përfituar subvencione.

I dyshuari që posedonte 600 mijë euro kesh i deklaroi vetëm 600 euro në bankë

ejup