Foto: KALLXO.com
Dy raste të dhunës ndaj grave në rajonin e Gjakovës
Dy gra dyshohet se kanë pësuar lëndime trupore si pasojë e dhunës së ushtruar nga bashkëshortët e tyre në rajonin e Gjakovës, specifikisht në Gjakovë dhe Rahovec, njofton Policia përmes raportit 24 orësh.
Një i dyshuar është arrestuar të mërkurën rreth orës 21:00 në Rahovec nën dyshimin se ka ushtruar dhunë ndaj bashkëshortes së tij.
Sipas Policisë, rastin në Polici e ka raportuar babai i viktimës. Ndërkaq, viktimës për shkak të lëndimeve të marrura i ëshët dhënë ndihmë mjekësore në Qendrën e Mjekësisë Familjare në Rahovec. Ndërsa pas intervistimit viktima është dërguar në shtëpinë e prindërve të saj.
I dyshuari pas intervistimit, në konsultim me prokurorin është liruar në procedurë të rregullt.
Ndërsa, në rastin tjetër është arrestuar një i dyshuar në Gjakovë rreth orës 16:00, nën dyshimin se ka ushtruar dhunë ndaj bashkëshortes së tij. Sipas Policisë, viktima ka pranuar tretman mjekësor. .
Pas intervistimit me vendim të prokurorit i dyshuari lirohet në procedurë të rregullt. Rasti nën hetime.
Në raportin 24 orësh të Policisë janë raportuar edhe katër raste të dhunës në familje në rajonin e Pejës, tri në Pejë dhe një në Deçan.