Dy ditë pas tensioneve në veri, policia po vazhdon angazhimet e situata raportohet e qetë
Dy ditë pasi kryetarët e rinj të Leposaviqit, Zubin Potokut e Zvecanit nën përcjellje të policisë arritën që të hyjnë brenda objekteve komunale e që e gjithë kjo situatë solli tension, situata gjatë ditës së sotme është raportuar e qetë në atë pjesë.
Zëdhënësi i Policisë, Baki Kelani për KALLXO.com ka konfirmuar se policia po vazhdon me angazhimet e saj.
“Situata e sigurisë së përgjithshme në vend është e qetë, një situatë e tillë edhe përkundër zhvillimeve të fundit, sot vazhdon të jetë qetë edhe në veri të vendit, ku Policia e Kosovës po kryen detyrat dhe angazhimet e saja me njësitet relevante policore”- tha Kelani për KALLXO.com.
Mëngjesin e së premtes, kryetarët e tri komunave në veri të Kosovës, Leposaviq, Zubin Potok e Zvecan, tentuan që të futeshin brenda objekteve komunale por që kjo fillimisht u pengua pasi në oborret e këtyre komunave ishin mbledhur dhjetëra qytetarë të cilët në formë proteste penguan kryetarët.
E më pas ishte Policia e Kosovës e cila me njësitet e saj, ofroi siguri dhe mundësoi që kryetarët Izmir Zeqiri kryetar i ri i Zubin Potokut, Ilir Peci kryetar në Zveçan e Lulzim Hetemi në Leposaviq të futeshin brenda objektit të komunës për të ushtruar detyrat e tyre si udhëheqës të këtyre komunave.
Por kjo situatë rriti tensionet sidomos në Zveçan e Leposaviq. Në këto dy komuna policia përdori edhe gazin lotsjellës për të shpërndarë turmën e cila ishte mbledhur atje.
KALLXO.com ka përcjellë nga afër të gjitha zhvillimet që ndodhën në pjesën e veriut të Kosovës gjatë dy ditëve të fundit.
Pesë polic kishin marrë lëndime trupore të lehta nga përballja me turmën që ishin mbledhur në komunat Leposaviq e Zveçan.
Persona të dyshuar, kanë demoluar edhe vetura të policisë madje njërës ia kanë vërë flakën.
Përveç veturave të policisë, u dëmtuan edhe vetura të gazetarëve që po raportonin atje.
Mes turmave u panë edhe persona të maskuar të cilët gjuanin me gurë në drejtim të policisë. Në këto ngjarje u dëgjuan edhe të shtëna armësh. Në Leposaviq, një grup personash vendosën 3 barrikada për të bllokuar hyrjen e komunës.
Makineritë e rënda u larguan nga rruga dhe u mundësua më pas edhe qarkullimi. Largimin e bënë njësitet policorë të cilët edhe sot janë parë në afërsi të komunave me shumicë serbe në veri të Kosovës, deri sa po ofrojnë rend dhe siguri.
Nga dita e nesërme pritet që kryetarët të dalin nëpër vendet e tyre të punës pra në komunat e lartëpërmendura, që të kryejnë detyrat e tyre.
Situata e së premtës solli reagime të ndryshme e të ashpra.
Kongresisti amerikan, Ritchie Torres, ka komentuar deklaratën e sekretarit amerikan Anthony Blinken lidhur me situatën në veri të Kosovës.
Kongresisti amerikan është shprehur i zhgënjyer nga deklarata e sekretarit Blinken që kritikoi vendimin e autoriteteve kosovare që kryetarët e tri komunave të shkojnë të ushtrojnë detyrën në objektet e Komunës.
Torres përmendi faktin që Kosova ishte e para që pranoi refugjatët afganë, gjë që ishte kërkesë e ShBA-ve.
“Kosova është një aleat i palëkundur i SHBA-së. Kur SHBA-ve u duheshin vende për të pranuar refugjatët afganë, Kosova ishte e para dhe ndër të paktat që u ngrit në këtë rast. Është zhgënjyese për mua dhe për votuesit e mi shqiptarë të shoh Sekretarin Blinken të sulmojë publikisht një aleat të SHBA-së” – ka shkruar kongresisti amerikan në Twitter.
Emisari i Gjermanisë për Ballkanin Perëndimor, Manuel Sarrazin gjatë ditës së djeshme ka qenë në Mitrovicë, ku në një deklaratë për media tha se nuk duhet të humbur shansin që e ofron Marrëveshja e Ohrit.
“Dje kam vendosur në mënyrë spontane që të vij në Kosovë, pas zhvillimeve për çka kemi qenë shumë të shqetësuar dhe dua të them se dita e djeshme ka qenë një ditë mjaftë e rëndë, mjaft e keqe për Kosovën dhe gjithë Ballkanin Perëndimor”, tha Sarrazin.
Ai tha se marrëveshja e arritur në Ohër me ndërmjetësim të Bashkimit Evropian, përfaqësuesit të jashtëm Borrell dhe emisarit Lajcak është mundësi e mirë për gjithë rajonin e sidomos Kosovën dhe Serbinë për paqe dhe qetësi dhe se nuk duhet të lëshuar shansin, mundësitë, që i ofron Marrëveshja e Ohrit, për hirë të disa vendimeve të pamenduara mirë.
“Porosia jonë është se ne nuk do të lejojmë që këto mundësi nga marrëveshja e Ohrit të hedhen poshtë nga ndonjë budallallëk”, ka thënë ai.
Misioni i NATO-s në Kosovë, KFOR ka deklaruar se është duke monitoruar nga afër situatën në komunat në veri të Kosovës, pas zhvillimet atje për shkak të hyrjes së kryetarëve të posazgjedhur në ndërtesat e komunave.
KFOR në një përgjigje për KALLXO.com ka thënë se kjo është jashtëzakonisht e rrezikshme për procesin e normalizimit dhe rrezikon përshkallëzimin e mëtejshëm të tensioneve.
Gjithashtu, KFOR-i thotë se dënon me vendosmëri “këto akte të njëanshme” dhe u bën thirrje të gjitha palëve që të përmbahen nga dhuna që mund të kërcënojë sigurinë në Kosovë.
“KFOR-i është duke monitoruar nga afër situatën në Komunat në veri të Kosovës ku janë shkaktuar një sërë përplasjesh nga hyrja e dhunshme e kryetarëve të sapozgjedhur në ndërtesat e komunave. Kjo është jashtëzakonisht e rrezikshme për procesin e normalizimit dhe rrezikon përshkallëzimin e mëtejshëm të tensioneve”
Aleanca ushtarake e NATO-s i ka bërë thirrje institucioneve të Kosovës që të “shtensionojnë” menjëherë situatën në veri të vendit.
Zëdhënësja e NATO-s, Oana Lungescu thotë se i bëjnë thirrje të gjitha palëve që të zgjidhin situatën përmes dialogut.
“Ne u bëjmë thirrje institucioneve në Kosovë të shtensionojnë menjëherë situatën dhe u bëjmë thirrje të gjitha palëve që të zgjidhin situatën përmes dialogut. Misioni i NATO-s, KFOR, vazhdon të jetë vigjilent dhe të ofrojë mjedis të sigurt” – ka shkruar në Twitter ajo.