Dy binjakët që lindën në ditë, muaj dhe vite të ndryshme

“Është çmenduri për mua që ata janë binjakë dhe kanë ditëlindje të ndryshme”, tha nëna Fatima Madrigal për binjakët e saj Alfredo dhe Aylin.

Binjakët nga Kalifornia sapo festuan lindjet e tyre në ditë, muaj dhe vite të ndryshme falë një ndodhie të rrallë, raporton “People”.

Të premten në mbrëmje, prindërit Fatima Madrigal dhe Robert Trujillo nga Greenfield mirëpritën një djalë të quajtur Alfredo në natën e Vitit të Ri në orën 23:45 sipas kohës lokale.

Vetëm 15 minuta më vonë, pikërisht kur ora shënoi mesnatën, çifti mirëpriti motrën binjake të Alfredos, të quajtur Aylin, ditën e Vitit të Ri.

Në një deklaratë për shtyp nga Qendra Mjekësore Natividad, Madrigal shpjegoi ndjenjat e saj pas ditëlindjeve unike të fëmijëve të saj të porsalindur.

“Është çmenduri për mua që janë binjakë dhe kanë ditëlindje të ndryshme”, tha ajo.

Dr. Ana Abril Arias, një mjeke familjare në Grupin Mjekësor Natividad, shtoi: “Kjo ishte padyshim një nga lindjet më të paharrueshme të karrierës sime.”

“Ishte një kënaqësi absolute të ndihmoja këta të vegjël të mbërrinin këtu të sigurt në vitin 2021 dhe 2022”, tha ajo. “Çfarë mënyrë e mrekullueshme për të filluar Vitin e Ri!”

Sipas Qendrave për Kontrollin dhe Parandalimin e Sëmundjeve (CDC), zakonisht ka 120,000 lindje binjake çdo vit në Shtetet e Bashkuara. Lindjet përbëjnë pak më shumë se 3 për qind të të gjitha lindjeve, thotë organizata.

Alfredo dhe Aylin tani bashkohen me tre vëllezër e motra më të mëdhenj – dy vajza dhe një djalë.

Madrigal tha se djali i saj më i madh është i emocionuar që ka një vëlla dhe pjesa tjetër e familjes së tyre është e emocionuar për të takuar më të vegjëlit.