Driton Selmanaj nuk komenton sjelljet e bashkëpartiakut të tij karshi Vjosa Osmanit

Seanca e Kuvendit është ndërprerë pas vërsuljes që i është bërë kryetares së kuvendit, Vjosa Osmani nga ana e bashkëpartiakut të saj Xhavit Ukaj.

I kontaktuar në lidhje me këtë ngjarje, Driton Selmanaj nuk ka komentuar veprimet e kolegut të tij nga Prizreni.

“Të kërkoj ndjesë është shumë vonë. Natën e mirë”, ka thënë shkurt Selmanaj dhe ka mbyllur telefonin.

Gjatë kohës sa Osmani po i jepte fjalën deputetes Ganimete Musliu, në këtë debat ka ndërhyrë deputeti Xhavit Ukaj nga LDK.

Osmani i ka replikuar deputetit duke i thënë “A po ulesh edhe mos bërtit, sepse jeni ju që më së shumti e keni përdor për 52 ditë fjalën paranojak, ulu ose kërkoj prej sigurimit me të qitë jashtë”, ka thënë Osmani.

Pas fjalës së Osmanit, deputeti Ukaj ka vazhduar përplasjen e tij me kryetaren e Kuvendit të Kosovës, Vjosa Osmani.

Pas kësaj, deputeti i është afruar deri tek ulësja kryetares së Kuvendit duke ju vërsulur.

Tek foltorja janë mbledhur një numër i madh i deputetëve duke tentuar që të ndalojnë përplasjen mes kryetares së Kuvendit dhe deputetit Ukaj.

Pas kësaj, kryetarja e Kuvendit të Kosovës, Vjosa Osmani ka ndërprerë seancën e Kuvendit me arsyetimin e paedukatës së deputetit Ukaj.

.