Drejtoria doganore: Autobusi nuk ishte regjistruar në doganë kur kishte kaluar kufirin

Doganierët nuk e kanë regjistruar autobusin e djegur të “Besa Trans” kur ai ka kaluar kufirin, por kanë regjistruar vetëm pasagjerët që ndodheshin në të.

Kjo është konstatuar nga kontrolli i brendshëm i Drejtorisë Doganore, raporton Alsat-M.

Institucioni përkatës njofton se dy punonjësit që ishin në detyrë atë ditë do të pezullohen nga puna, ndërsa shefi i tyre do të gjobitet.

“Për automjetin me targa SK 0284 BA të transportuesit BESA Trans nga Shkupi, në periudhën prej datës 15.10.2020 deri më 11.11.2021 Drejtoria doganore ka regjistruar disa vendkalime nëpër vendkalimet kufitare: GCI Deve Bair, GCI Blace, GCI. Kafasa GCI Dellçevo, për lloje të ndryshme të transportit, përfshirë evidencën e numrit të Ekstraktit nga Licenca për kryerjen e transportit publik në komunikacionin rrugor ndërkombëtar – transport pa pagesë të udhëtarëve. Autenticiteti i këtyre dokumenteve të bashkangjitura do të kontrollohet shtesë nga transportuesi”, thuhet në njoftimin e Drejtorisë Doganore.

Së paku 46 persona mbetën të vdekur nga aksidenti tragjik që ndodhi mëngjesin e së martës në Bullgari, në një autobus që po bartte udhëtarë nga Turqia për në Maqedoni të Veriut./Alsat-M